Թուրքիայի Հաթայ քաղաքում փետրվարի 20-ին տեղի ունեցած երկու ուժեղ երկրաշարժի հետևանքով փետրվարի 6-ի ցնցումներից հետո վնասված բազմաթիվ շենքեր վերջնականապես հողին են հավասարվել։ Այս մասին Sputnik Արմենիայի հետ զրույցում հայտնեց «Ակոս» թերթի խմբագիր Բագրատ Էստուկյանը։
«Բազմաթիվ շենքեր հողին են հավասարվել, սակայն այս անգամ մարդկային կորուստներն ավելի քիչ էին, քանի որ դրանք բնակեցված չէին»,– ասաց Էստուկյանը։
Նա նշեց, որ այս երկրաշարժի պատճառով մի քանի տասնյակ մարդ վիրավորվել է։
Էստուկյանի խոսքով` շատերը լքել են աղետի գոտին, սակայն շատերը շարունակում են այնտեղ մնալ։ Նրանք հիմնականում վրաններում են ապրում։
Նա ընդգծեց` երեկվա երկրաշարժից մահացածքաղաքացիներից 3-ը (Թուրքիայի նահանգապետ Լյութֆյու Սավաշի տվյալներով զոհերն ընդհանուր առմամբ 8-ն են եղել,– խմբ.) գնացել էին իրենց բնակարաններ, որպեսզի որոշ ապրանքներ դուրս բերեն։ Էստուկյանը հայտնեց, որ անձամբ ինքը տեղյակ չէ` վերջին ցնցումների հետևանքով ազգությամբ հայեր զոհվել են, թե ոչ։
Էստուկյանն ընդգծեց նաև, որ այլ երկրներից օգնություն ցուցաբերելու համար Թուրքիա ժամանած փրկարարական ջոկատների մեծ մասն արդեն վերադարձել են իրենց հայրենիք, սակայն մի մասը դեռևս շարունակում է աշխատանքներ իրականացնել։
Հիշեցնենք` Սիրիայի և Թուրքիայի սահմանին փետրվարի 20–ին, Երևանի ժամանակով 21.05–ին, 6,4 մագնիտուդով նոր երկրաշարժ է տեղի ունեցել, որին հաջորդել է մի քանի քանի հետցնցում, որոնցից ամենաուժգինը` 5,8 մագնիտուդ։ Թուրքիայի Հաթայ նահանգը հոսանքազրկված է, ավերածություններ կան։
