Ծիծաղելի է, որ մի 100 ընտանիքի հանելու համար էսքան ոստիկաններ են բերել լցրել. Թող պատերազմի ժամանակ գնային, որ իմ 18 տարեկան տղան չգնար հողի տակ պառկեր: Այս մասին այսօր՝ փետևրվարի 16-ին, ՊՆ նախկին շենքի մոտ լրագրողների պատմեց շենքի բնակիչներից մեկը՝ Ասյա Սահակյանը:
Նշենք, որ ՊՆ նախկին շենքում արդեն երկար ժամանակ տեղավորվել են եւ բնակվում են քաղաքացիներ՝ իրենց ընտանիքներով: Այսօր առավոտյան հարյուրավոր ոստիկաններ են եկել եւ բերման են ենթարկել բնակիչներից մի քանիսին: Ոստիկանները դուրս ենհանել բնակիչներին, որոնք մնացել են դրսում:
«Ես ինքս հերոսի մայր եմ, Խորեն Հաջաթյանի մայրն եմ, տուն չունեմ, դիմել եմ կառավարությանը, ասում են՝ տեղի գրանցում չունես, քեզ տուն չենք տա: Ես ունեմ Արագածոտնի մարզի գրանցում, բայց այնտեղ չունեմ տուն: Ես տուն չունեմ, եկել, նստել եմ էստեղ: Առավոտյան երեխայիս դասի եմ տանում, գալի տեսնում եմ էստեղ ահավոր վիճակ է: Ի՞նչ իրավունք ունի ոստիկանը կոտրի իմ դուռը: Ասում են՝ անօրինական եք էստեղ բնակվում, դուրս եկեք, սա պետական շենք է:
Ինձ էսօր տուն չեն տալիս, ես ո՞ւր գնամ: Ամուսնուս վատ վիճակում բերման են ենթարկել, նստած է մեքենայի մեջ: Ասում եմ՝ ամուսնուս թողեք, ինձ ասում է՝ քեզ կանացի պահի: Թող ինքը գնա իր կնոջ մասին մտածի, որ տուն քանդողի կին է:
Ես ասում եմ՝ ներսում ապրանք ունեմ, ասում են՝ հետո կգաս մեր ներկայությամբ ապրանքդ կհանես: Ներսում այս պահին ահավոր վիճակ է: Տղամարդկանց բերման են ենթարկել, որ ուժ չգործադրեն, կանանց, երեխեքին ադյալով փաթաթած հանել են դուրս: 9 մսական երեխային դուրս են հանել: Ներսում մենք ունենք 3 ամսականից մինչեւ 12 տարեկան երեխաներ, բոլորը գոռում են, լացում են, դրա համար լրագրողներին չեն թողնում ներս»,-ասաց նա:
Ավելի վաղ NEWS.am-ը հայտնել էր, որ դեռևս այս տարվա ապրիլի 15-ի որոշումով կառավարությունը Երևան-Աշտարակ մայրուղու վրա գտնվող ՊՆ նախկին շենքը ամրացրել էր ՊԵԿ-ին, որպեսզի այն դառնա արտաքին տնտեսական գործունեության (ԱՏԳ) կենտրոն։
Վերջերս էլ ՊԵԿ-ը դիմել են պատկան մարմիններին՝ բողոքելով, որ ինչ-որ մարդիկ ինքնակամ եկել, տեղավորվել են այդ շենքում: Շաբաթներ առաջ անջատել էին շենքի էլեկտրականությունը, բնակիչներն էլ փակել էին ճանապարհը՝ պահանջելով միացնել հոսանքը:
