Խաղաղության պայմանագիրը այն մասին է, որ հնարավորինս ամեն ինչ հստակ լինի, հայկական կողմը աշխատում է այդ հստակության վրա։ Այս մասին լրագրողների հետ ճեպազրույցի ընթացքում ասաց ԱԽ քատրուղար Արմեն Գրիգորյանը։
«Մենք կողմ ենք, որ ստեղծվի երաշխավորի ինստիտուտ, հաշվի առնելով մեր երեք տարվա փորձը։ Հայաստանը կողմ է, որ միջազգային տեսանելի մեխանիզմի շրջանակում քննարկումներ տեղի ունենան Ստեփանակերտի ու Բաքվի միջև։ Հայաստանը շարունակում է աշխատել իր միջազգային գործընկեների հետ, որ այս մեխանիզմը կայանա։ Այս մեխանիզմին կարող է անդրադարձ լինել խաղաղության պայմանագրում»,- ասաց նա։
Գրիգորյանը խոսեց Խաղաղության պայմանագրի քննարկումների շուրջ Հայաստանի մոտեցումների մասին։
«Միջազգային տեսանելի մեխանիզմ պետք է ստեղծվի, որպեսզի Բաքվի ու Ստեփանակերտի միջև քննարկումներ տեղի ունենան՝ անվտանգության ու իրավունքների շուրջ։ Հայաստանը ստացել է իր առաջարկած տեքստին պատասխան, հիմա հայկական կողմն է աշխատում այդ տեքստի վրա ու հնարավորինս շուտ այն պատրաստ կլինի ու պատրաստ կլինենք այն փոխանցել Ադրբեջանին։ Այս պահին չեմ կարող ասել, թե այդ փոխանցումը ինչպես տեղի կունենա»,- նշեց Գրիգորյանը։
Հարցին՝ քննարկվող փաստաթղթերում ԼՂ-ի մասին հիշատակում կա՞ արդյոք, Գրիգորյանը ասաց․
«ԼՂ-ի մասին հիշատակում կա, բայց պետք է հաշվի առնել, որ այդ փաստաթուղթը վերջնական չէ, բանակցություններ են ընթանում»։
