Թուրքիայի Հաթայ նահանգում երկրաշարժերից հետո ամբողջությամբ ավերված Rönesans Rezidans բնակելի համալիրի գլխավոր ճարտարապետը ձերբակալվել է Ստամբուլի օդանավակայանում երկրից փախչելու փորձի ժամանակ։ Այս մասին հաղորդում է Sabah թերթը։
Թուրքիայի արդարադատության նախարար Բեքիր Բոզդաղն ավելի վաղ հայտարարել էր, որ ոչ ոք չի խուսափելու պատժից այն անփութության համար, որը հանգեցրել է երկրաշարժի ժամանակ շենքերի փլուզման։ 1999 թվականի՝ ավելի քան 18 հազար մարդու կյանք խլած աղետալի երկրաշարժից հետո Թուրքիայում վերանայել են բնակելի շենքերի կառուցման կանոնները։ Մասնավորապես, 2007 թվականին ընդունվել է բնակելի շինությունների կառուցման օրենսգիրք, որում նշված են երկրաշարժերից պաշտպանվելու համար անհրաժեշտ պահանջները։
«Բնակելի համալիրի 250 բնակարանի վաճառքի համար միլիոնավոր լիրաներ ստացած գլխավոր կապալառուն՝ Մեհմեդ Յաշար Չոշքունը ձերբակալվել է Ստամբուլի նոր օդանավակայանում՝ Մենտենեգրո փախչելու փորձի ժամանակ։ Ստամբուլի գլխավոր դատախազության կողմից երկիրը լքելու արգելք է դրվել»,- գրում է թերթը։
Հաղորդվում է, որ 2012 թվականին շահագործման հանձնված բնակելի համալիրում բնակարանները վաճառվել են 1,5-3 միլիոն լիրայով (800 000-1 600 000 ԱՄՆ դոլար)։ Երկրաշարժի հետևանքով տասներկուհարկանի բնակելի համալիրը վայրկյանների ընթացքում ամբողջովին ավերվել է։
