Թեհրանից տարհանված Իրանում Ադրբեջանի դեսպանատան աշխատակիցներով և նրանց ընտանիքներով ինքնաթիռը կիրակի երեկոյան վայրէջք է կատարել Բաքվում։ Այս մասին գրում է Интерфакс-ը։
«Ադրբեջանական ավիաուղիների» հատուկ չվերթով Իրանից տարհանվել են դեսպանատան աշխատակիցները, հայտնում են ադրբեջանական լրատվամիջոցները։
Բաքու է հանձնվել նաև դիվանագիտական ներկայացուցչության վրա զինված ահաբեկչության հետևանքով զոհված դեսպանատան անվտանգության ծառայության ղեկավար Օրխան Ասկերովի դին։ Բացի այդ, Ադրբեջանի մայրաքաղաք է թռչել դեսպանատան վիրավոր մի պահակ։
Ադրբեջանի փոխարտգործնախարար Խալաֆ Խալաֆովը, լրագրողներին մեկնաբանելով դեսպանատան վրա կատարված զինված հարձակումը, ասել է. «Վիեննայի կոնվենցիայի համաձայն՝ երկիրը, որտեղ գտնվում է դեսպանատունը, պատասխանատու է անվտանգության համար։ Հետևաբար, Իրանը պատասխանատու է ահաբեկչության և դրա ծանր հետևանքների համար»։
Նա ասել է, որ Ադրբեջանի դեսպանատունը դադարեցրել է աշխատանքը, սակայն Թավրիզում գլխավոր հյուպատոսությունը շարունակում է գործել։
