Ռուսական անձնագրեր ունեցող Ղրղզստանի և Տաջիկստանի քաղաքացիներին արգելվում է լքել Ռուսաստանը:
«Ռուս սահմանապահներն ինձ բավականին քաղաքավարի բացատրեցին, որ «դու ընդգրկված ես մոբիլիզացիոն ցուցակում, դա օրենք է, և դու իրավունք չունես արտերկիր մեկնելու մինչև փետրվարի 12-ը», – «Ազատությանը» պատմել է Ղրղզստանից Բեկբոլատը:
Ծնունդով Տաջիկստանից մեկ այլ քաղաքացու, որը փորձել է վերադառնալ հայրենիք, նույնպես հետ են ուղարկել Սուրգուտ՝ ռուսական անձնագիր ունենալու պատճառով:
Այս առնչությամբ, ռուսաստանցի հայ փաստաբան հայ-ռուսական իրավաբանների «ԱրմՌոսս» ասոցիացիայի նախագահ Ռուբեն Կիրակոսյանը։ «Առաջին լրատվական»-ի հետ զրույցում նշեց, որ չի լսել նման արգելքների մասին. «Մի ժամանակ խոսվում էր այն անձանց մասին, որ նոր են ընդունել ՌԴ քաղաքացիություն, պարտականություն ունեն Ռուսաստանին: Այդպիսի խոսակցություն կար, բայց որ դա արդեն ուժի մեջ է, ճիշտն ասած, տեղյակ չեմ, որովհետև հայաստանցիների վերաբերյալ դեռ տեղեկություններ չկան: Չեմ լսել որևէ դեպք, որ ազգությամբ հայ քաղաքացուն արգելեն լքել Ռուսաստանը: Եթե այդպիսի փաստաթուղթ հրապարակվի, պետք է նայել, թե խոսքն ինչ մասին է, ինչ ձևակերպումներ կան: Պետք է պարզաբանված լինի, թե ինչ սկզբունքով են արգելում, դժվար թե դա պայմանավորված լինի ազգությամբ: Ես ուղղակի լսել էի, որ մի քանի պաշտոնյա առաջարկել էին, որ այն օտար երկրի քաղաքացիները, որոնք նոր են ընդունել ՌԴ քաղաքացիություն, ինչ-որ ձևով պետք է շնորհակալ լինեն Ռուսաստանին: Նման մի բան կար»,-ասաց նա:
Ռուբեն Կիրակոսյանի խոսքով՝ ՌԴ-ում որևէ խոսակցություն չկա մոբիլիզացիայի նոր ալիքի մասին. «Այստեղ խոսում են այն մասին, որ կարող է լինել պարզապես պլանային զորակոչ և տարիքային սահմաններն են մեծացնում: Որքան ես լսել եմ՝ այդ սահմանը դարձնում են՝ 21-35 տարեկան: Այսինքն ստորին շեմը 18-ից բարձրացնում են 21 տարեկանի, 21 տարեկանից են ուզում սկսել զորակոչել: Բայց նաև բարձրացնում են վերին շեմը: Նաև ուզում են ավելացնել ծառայության ժամկետը: Հիմա մեկ տարի է զինծառայության ժամկետը, ուզում են երկու դարձնել»,-ընդգծեց փաստաբանը:
Հարցին՝ հիմա կա՞ն դեպքեր, որ անօրինական կերպով քաղաքացիներին, այդ թվում՝ հայաստանցիներին, փորձել են զորակոչել բանակ, նա պատասխանեց. «Դե դա վերաբերում էր մոբիլիզացիայի օրերին: Հետո դա անցավ, Պուտինն ինքը հայտարարեց, որ եղել են մեծ քանակությամբ անարդար երևույթներ, որ համակարգը պատրաստ չի եղել: Զինկոմիսարների վրա պլան էին դրել, բայց չէին բացատրել, թե ինչ հիմքով մարդկանց հավաքագրել, դրա համար անօրինականություններ էին եղել: Հիմա հայտարարում են, որ փորձում են համակարգն ուղղել, որ ավելի արդյունավետ աշխատի: Շատ բան չեն հրապարակում և պարզ չէ:
Ես այստեղ մի քանի սպաների հարցրել եմ, ասում են, որ այն ժամանակ մոբիլիզացիա էր և մեծ քանակով զինուժի կարիք կար, բայց հիմա այդ հարցը կայունացրել են: Անգամ հիմա նշվում է, որ այն ժամանակ մոբիլիզացվածներից շատերը դեռ չեն էլ անցել ծառայության, դեռ նախապատրաստման ճամբարներում են գտնվում»:
Ռուբեն Կիրակոսյանն անդրադարձավ նաև Դմիտրի Մեդվեդևի հայտարարությանը, թե այն ՌԴ քաղաքացիները, որոնք լքել են կամ կլքեն երկիրը, նրանց նկատմամբ որոշակի սահմանափակումներ կլինեն, չեն թողնի վերադառնալ. «Ոչ մի նորություն չկա այդ մասով: Այո, խոսվեց դրա մասին, բայց հետո երևի հասկացան, որ մարդու սահմանադրական իրավունքների խախտում է: Գուցե ինչ-որ ձևով կսկսեն սանկցիաներ կիրառել լքողների նկատմամբ, բայց այս մասին դեռ չկա որոշում, թե դա ինչպես անել: Բայց որ ՏՏ ոլորտի մասնագետներին փորձում են հետ հրավիրել, դա փաստ է, քանի որ կարիքը կա: Հիմա ուզում են նրանց տարկետման իրավունք տալ, որ հանգիստ վերադառնան»:
Հարցին, թե հայերից շատ կա՞ն, որ փորձում են վերադառնալ Հայաստան՝ գիտակցելով, որ պատերազմը կարող է տարիներ ձգվել, փաստաբանը պատասխանեց. «Պատերազմի սկզբին վերադարձողների շատ մեծ ալիք առաջացավ ՌԴ-ից Հայաստան: Բայց հետո այդ իրավիճակը շտկվեց: Ես եզրակացության եկա, որ ճգնաժամային պահին Ռուսաստանը լքեցին այն մարդիկ, որոնք այդքան արմատավորված էլ չէին: Մնացին նրանք, որոնք ավելի հիմնավորված են, ավելի խորն են ամեն ինչ ընկալում: Ճիշտն ասած, այստեղ հայկական համայնքի նույնիսկ դեմքը մի քիչ փոխվեց, հիմա ավելի կիրթ է, ընտրյալ է, անհասկանալի թափառողները չեն էլ երևում արդեն, որոնք ինչ-որ արկածախնդրային հիմքերով էին ՌԴ-ում»:
1in.am
