Պապիկյանն այս ամենի հետ չի կարող կապ ունենալ. Ալեն Սիմոնյանը` վաշտի կացարանի հրդեհի մասին

Իմ ունեցած տեղեկությունները շատ չեն տարբերվում հայտնի տվյալներից. Գիշերը քնած են եղել, իրենցից մեկը որոշել է, որ կրակը պետք է ուժեղացվի եւ 5 լիտրանոց տարայով լցրել է, որից հետո բռնկվել է ինքը, ու վախից շպրտել է տարան եւ ամբողջ սենյակն այրվել է: Այս մասին այսօր՝ հունվարի 23-ին, ԱԺ-ում լրագրողների հետ զրույցում նշեց ԱԺ նախագահ Ալեն Սիմոնյանը՝ անդրադառնալով հունվարի 19-ին Ազատ գյուղում զինվորների կացարանի միջադեպին, որի հետեւանքով 15 զինվոր է զոհվել:

«Նաեւ զինծառայողների պատմածներից է այդպիսի տպավորություն: Չեմ ուղում շատ բաներ պատմել, որովհետեւ զուտ անձնական զրույց է եղել: Թող նախքաննությունը գնա, բոլոր մեղավորները նաեւ քրեաիրավական պատասխանատվություն կկրեն»,-ասաց նա:

Անդրադառնալով նրան, որ պաշտպանության նախարարը պաշտոնանկ չի արվել, թեեւ սոցցանցերում բազմաթիվ օգտատերեր պահանջում էին կառավարության, հատկապես Պապիկյանի հրաժարականը, ԱԺ նախագահն ասաց. «Պաշտպանության նախարարն այս ամենի հետ որեւէ ձեւով չի կարող կապ ունենալ, որովհետեւ իր գործառույթի մասով ինքն իր աշխատանքը ամբողջովին արել է: Այդ քաղաքական սակարկումները նախարարի վերաբերյալ սին ու անտեղի եմ համարում: Այն բարեփոխումները, որ պարոն Պապիկյանն իրականացնում է եւ նաեւ այն պատասխանատվությունը, որ նա իր վրա վերցրել է պատերազմից հետո, համաձայնություն տալով այդ վիճակում բանակը վերցնելու եւ բարեփոխումներ սկսելու:

Հարցին, թե բարեփոխումների օրինակ կբերե՞ք, Ալեն Սիմոնյանը պատասխանեց. «Ինձ թվում է՝ դուք ամեն ինչ բաց եք թողնում, ձեզ ավելի լավ է ներկայացնեք վատ բաները: Բարեփոխումներ արվել են սկսած անձնակազմի փոփոխությունից, վերջացրած կահավորումից, որը բոլոր տեղերում փոխվել ու փոխվում է: Մենք հիմա նաեւ դրսից տարբեր որակի ու տարբեր բարձր մակարդակի կահավորում ենք ներմուծելու Հայաստան»:

Ավելի վաղ NEWS.am-ը հայտնել էր, որ հունվարի 19-ին, ժամը 01:30-ի սահմաններում Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում բռնկված հրդեհի հետեւանքով զոհվել է 15 ժամկետային զինծառայող, 7 զինծառայող տեղափոխվել է Վարդենիսի հոսպիտալ, նրանից չորսը բուժօգնություն ստանալուց հետո դուրս է գրվել, 3–ը՝ ծանր վնասվածքներով տեղափոխվել Երեւան՝ Այրվածքաբանության ազգային կենտրոն:

Դեպքից անմիջապես հետո պաշտոններից ազատվել են 2-րդ բանակային կորպուսի հրամանատարը եւ եւս 7 բարձրաստիճան զինվորականներ։

Դեպքից ժամեր անց վարչապետ Նիկոլ Փաշինյանը կառավարության նիստում ներկայացրեց պաշտոնական վարկածը, ըստ որի սպան բենզին է լցրել վառարանի վրա, ինչից հետո, երբ կրակն իրեն է անցել, «ինքնապաշտպանական բնազդով» բենզինի 5 լիտրանոց տարան նետել է կացարանի ուղղությամբ, ինչն էլ հրդեհի պատճառ է դարձել։

Ավելի ուշ դասակի հրամանատարը լրագրողներին հայտնել էր, որ կացարանում բենզին չի եղել, ըստ էության, հերքելով վարչապետին: Զինդատախազը եւս հայտարարել էր, որ դեռ պարզ չէ՝ բենզին է եղել, թե դիզվառելիք:

Ընդհանրապես, այդ դեպքի հետ կապված հանրության մոտ բազմաթիվ հարցադրումներ են առաջանում, օրինակ, ինչո՞ւ պատշաճ կեցավայրում չեն ապրել զինվորները , այլ գյուղական տանը, որը չի համապատասխանել զորանոցի անվտանգության չափանիշերին։

Հանրությունը վրդովված է նաեւ նրանից, որ պաշտպանության նախարարը այդպես էլ չի այցելել դեպքի վայր:

Շատերը պահանջում են նախարար Սուրեն Պապիկյանի, որպես կատարվածի գլխավոր պատասխանատուի հրաժարականը։

Նշենք, որ հրդեհի դեպքի առնչությամբ նախաձեռնվել է քրեական վարույթ՝ ՀՀ ՔՕ 532-րդ հոդվածի 4-րդ մասով (զենքի, ռազմամթերքի, ռազմական տեխնիկայի կամ ռազմական այլ գույքի, շրջապատի համար առավել վտանգ ներկայացնող նյութերի, սարքերի կամ առարկաների հետ վարվելու կանոնները խախտելը, որն անզգուշությամբ առաջացրել է երկու եւ ավելի անձի մահ)։