ԱՄՆ Սենատի արտաքին հարաբերությունների հանձնաժողովի նախագահ Բոբ Մենենդեսը խոստացել է շարունակել արգելափակել Թուրքիային ռազմական ինքնաթիռների փոխանցումը, եթե Անկարան չբարելավի մարդու իրավունքների հետ կապված իրավիճակը եւ չդադարեցնի սպառնալ ԱՄՆ տարածաշրջանային դաշնակիցներին: Այս մասին գրում է Politico-ն:
«Ես վճռականորեն դեմ եմ Բայդենի վարչակազմի առաջարկած Թուրքիային նոր F-16 ինքնաթիռների վաճառքին»,-ասել է Մենեդեսը՝ մեղադրելով Թուրքիայի նախագահ Ռեջեփ Էրդողանին նրանում, որ նա շարունակում է խաթարել միջազգային իրավունքը, անտեսել մարդու իրավունքներն ու ժողովրդավարական նորմերը, տագնապալի ու ապակայունացնող վարքագիծ դրսեւորել Թուրքիայում եւ ՆԱՏՕ-ի գծով հարեւան դաշնակիցների նկատմամբ։
«Քանի դեռ Էրդողանը չի դադարեցրել իր սպառնալիքները, չի բարելավել Թուրքիայում մարդու իրավունքների հետ կապված իրավիճակը, այդ թվում՝ լրագրողներին եւ քաղաքական ընդդիմությանը ազատ արձակելու ճանապարհով, եւ չի սկսել իրեն պահել այնպես, ինչպես պետք է իրեն պահի հուսալի դաշնակիցը, ես հավանություն չեմ տա այդ վաճառքին»,-ասել է Մենենդեսը:
