Ոստիկանությունը պարզաբանում է տարածել գյումրեցի ընդդիմադիր իրավապաշտպան Կարապետ Պողոսյանին երեխայի աչքի առաջ առևանգելու մասին սոցցանցերում և լրատվամիջոցներում հրապարակված լուրի առնչությամբ․
«Պարզաբանենք, որ Գյումրու Վարդանանց հրապարակում ծառայություն իրականացրած պարեկները նկատել են, որ «Նիսան» մակնիշի ավտոմեքենայի վարորդը տրանսպորտային միջոցը կայանել է հաշմանդամություն ունեցող անձանց տրանսպորտային միջոցների համար նախատեսված և համապատասխան գծանշումով վայրում: Խախտումը արձանագրելու համար պարեկները վարորդից պահանջել են համապատասխան փաստատթղթեր:
Նա հրաժարվել է կատարել պարեկների օրինական պահանջը և հասարակական վայրում դրսևորել է ոչ իրավաչափ վարքագիծ, որն արտահայտվել է հայհոյանքներ հնչեցնելով, ոստիկանության ծառայողների այլ օրինական պահանջներին չենթարկվելով, նրանց դիմադրելով:
Պարեկները տղամարդուն խուլիգանության կասկածանքով ձերբակալել ու տեղափոխել են ոստիկանության Կումայրիի բաժին:
Դեպքի վերաբերյալ կազմված փաստաթղթերը փոխանցվել են տարածքային քննչական մարմնին:
Հանգամանքները պարզվում են»:
Հիշեցնենք, գյումրեցի ընդդիմադիր իրավապաշտպան Կարապետ Պողոսյանի կինը՝ Անգին Մալխասյանը ֆեյսբուքյան իր էջում գրառում է կատարել՝ ահազանգելով, որ պարեկների ցուցումով Գյումրու կենտրոնական Վարդանանց հրապարակից իրենց մանկահասակ երեխայի աչքի առաջ առևանգել են ամուսնուն։
«Մեքենան կա, ամուսինս չկա
Ըստ տեղի պարեկների՝ անձնական ցուցումով առևանգել են ամուսնուս:
Ում անձնական ցուցումով է տեղի ունեցել քաղաքական հետապնդումն ու առևանգումը, մանկահասակ երեխայի աչքի առաջ»,- ներքոնշյալ լուսսանկարին կից գրել է Պողոսյանի կինը և հրավիրել ՀՀ ոստիկանության և ՀՀ ՄԻՊ-ի ուշադրությունը:
