Ռուսաստանի ԱԳՆ պաշտոնական ներկայացուցիչ Մարիա Զախարովան անտեղի է անվանել Լեռնային Ղարաբաղում ռուս խաղաղապահների հասցեին հնչող քննադատությունը։ Այս մասին Զախարովան ասել է ճեպազրույցի ժամանակ՝ պատասխանելով Լաչինի միջանցքում տիրող իրավիճակի մասին հարցին։
«Մենք բազմիցս ասել ենք, որ ռուս խաղաղապահներն անում են հնարավոր ամեն ինչ տեղում իրավիճակի կարգավորման համար։ Հրապարակային ոչ մի հարձակում գործին չի օգնում։ Իրավիճակն ավելի վատ էր։ Աշխատում ենք, որպեսզի իրավիճակը բարելավվի»,–նշեց նա։
Ավելի վաղ Հայաստանի վարչապետ Նիկոլ Փաշինյանը կոչ էր արել Լեռնային Ղարաբաղում ռուսական խաղաղապահ զորախմբին հանդես գալ Լաչինի միջանցքի վերաբերյալ իրավիճակի հստակ պարզաբանմամբ:
Դեկտեմբերի 12-ի առավոտյան Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին։
Դեկտեմբերի 13-ից ադրբեջանական կողմն անջատել էր նաև Արցախի գազամատակարարումը։ Դեկտեմբերի 16–ի առավոտյան Արցախի պետնախարար Ռուբեն Վարդանյանը հայտնեց, որ Արցախում գազամատակարարումը վերականգնվել է, և դա արվել է առանց որևէ նախապայմանի։
Լաչինի միջանցքը, սակայն, շարունակում է փակ մնալ։
