Հայաստանի եւ Իրանի միջեւ հարաբերությունները 2 հազար տարվա պատմություն ունեն, եւ մենք քաղաքական կայուն երկխոսություն ունենք: Այս մասին Ֆրանսիա այցի ժամանակ L’Express պարբերականի հետ հարցազրույցում ասել է Հայաստանի նախագահ Սերժ Սարգսյանը:
Նախագահի խոսքով՝ երկրների միջեւ ձեւավորվել է կայուն քաղաքական երկխոսություն, կան մշտական քաղաքական այցեր, եւ Հայաստանն այս երկրի հետ հարաբերություններ է պահպանում:
«Ցանկանում եմ նշել, որ Լեռնային Ղարաբաղի հարցում Իրանը մշտապես չեզոք դիրքորոշում է պահպանել, չնայած Ադրբեջանը փորձում է օգտագործել ընդհանուր կրոնական գործոնը: Իրանի հետ հարաբերությունները դրական բնույթ ունեն, ինչը եւս մեկ անգամ ընդգծում է այն փաստը, որ Հայաստանը հարգում է իր հարեւաններին եւ նրանց մշակույթը»,- նշել է Սարգսյանը:
Ի պատասխան հարցին՝ Հայաստանին մտահոգո՞ւմ է արդյոք Իրանի միջուկային ծրագիրը, ՀՀ նախագահը նշել է, որ Իրանի միջուկային ծրագրի վերաբերյալ 2015 թվականի հուլիսի համաձայնագիրը բացառիկ կառուցողական բնույթ ունի. «Ուրախությամբ կնշեմ, որ Ֆրանսիան աջակցում է այս համաձայնագրին, ինչի մասին նախագահ Մակրոնը հստակ է հայտարարել»:
