Դեկտեմբերի 18-ին, ժամը 17.50-ի սահմաններում, ահազանգ ստացվեց «911» ծառայություն: Մի կին հայտնում էր, որ իրենց բնակարան փորձում են գողեր մտնել: Հաղորդումն անմիջապես փոխանցվեց ոստիկանության օպերատիվ կառավարման կենտրոն, և քանի որ ահազանգողը Հակոբ Հակոբյան փողոցի բնակիչ էր, այստեղից էլ հաղորդումը վերահասցեավորվեց ոստիկանության Արաբկիրի բաժին:
Բաժնից նշված հասցե մեկնեց օպերատիվ խումբ: Տարածքը վերահսկելու և արձագանքման արագությունն ապահովելու նպատակով տեղյակ պահվեցին նաև մայրաքաղաքի պարեկները:
Արաբկիրի քրեական հետախույզների ձեռնարկած միջոցառումների շնորհիվ հենց շենքի շքամուտքում, բնակարանային գողության փորձ կատարելու կասկածանքով, ձերբակալվեցին և բաժին տեղափոխվեցին երկու տղամարդ: Բաժնում պարզվեց նրանց ինքնությունը. Երևանի Ուլնեցու փողոցի 42-ամյա և Վայք քաղաքի 45-ամյա բնակիչ էին: Խուզարկությամբ նրանց մոտից հայտնաբերվեցին տարբեր տեսակի բանալիներ, հարմարեցված գործիքներ, երկաթե առարկաներ, որոնք, ըստ նրանց, փական բացելու հարմարանքներ էին:
Երկուսն էլ տեղափոխվեցին քննչական բաժին, որտեղ քրեական վարույթ նախաձեռնվեց:
Ձեռնարկված օպերատիվ-հետախուզական միջոցառումների և քննչական գործողությունների արդյունքում պարզվեց, որ հենց նրանք էին վեց ամիս առաջ Կիևյան փողոցի շենքերից մեկում բնակարանային գողություն կատարել: Գողության մասին այդ հաղորդումը ոստիկանության Արաբկիրի բաժին ստացվել էր հունիսի 17-ին:
Նախաձեռնված քրեական վարույթը շարունակվում է:
`
