ՀՀ ԶՈւ ԳՇ նախկին պետ Մովսես Հակոբյանը չի բացառում Ադրբեջանի կողմից իրավիճակի էսկալացիայի հնարավորությունը։ Նա չի կարծում, թե ձմեռային եղանակը կարող է ազդել ադրբեջանական կողմի ծրագրերի վրա։
«Ես դրան անդրադարձել եմ մեկ տարի առաջ, որ դա լինելու է, ավելացնելու բան չունեմ»,-«Փաստինֆո»-ի հետ զրույցում, անդրադառնալով սահմանային անհանգստացնող իրավիճակին, ասել է Մովսես Հակոբյանը։
Հարցին, թե ստեղծված իրավիճակում, երբ այսպես կոչված՝ խաղաղության պայմանագրի շուրջ բանակցությունները կարծես թե փակուղի են մտել, նոր ռազմական սադրանքով Ադրբեջանը ի՞նչ նպատակ կարող է հետապնդել, Մովսես Հակոբյանը պատասխանել է․ «Ամեն ինչ շատ պարզ է․ երբ Ադրբեջանն իր ը նպատակներին քաղաքական ճանապարհով չի կարողանում հասնել, հասնում է ռազմական ճանապարհով»։
Ինչ վերաբերում է նրան, թե որ ուղղությունները կարող են թիրախավորվել հնարավոր ագրեսիայի դեպքում, ԳՇ նախկին պետը չի մանրամասնել՝ հղում անելով նախորդիվ հնչեցրած իր հայտարարությանը։ Ավելի վաղ նա ասել էր, որ մոտ ապագայում Հայաստանի Հանրապետության և Արցախի սահմաններին ռազմական գործողություններ են սպասվում․ ուղղությունները լինելու են Սյունիքում, Վարդենիսում, Տավուշում։ Չեն բացառվում նաև այլ ուղղությունները։
