Իսպանիայում վրացի օրենքով գող Գեգի Սվանի ծննդյան տոնակատարության ժամանակ նրա հյուրերը ծեծկռտուք են սարքել՝ Արտյոմ Սարգսյանը (Արտեմ Սարատովսկի) հարվածել է Ռամազ Ջինչարաձեին, հայտնում է «Փրայմ Քրայմը»։
Հրատարակության տվյալներով՝ միջոցառումը Բարսելոնայում հոբելյարի տանն է նշվել։ Ծեծկռտուքի պատճառն այն է եղել, որ Ջինչարաձեն չի սեղմել Սարգսյանի ձեռքը։ Նա, ընդհատելով առաջին իսկ կենացը, Ռամազից բացատրություններ է պահանջել, եւ դրանք չստանալով՝ հարվածել է նրան։
Օրենքով գող Էդիկ Ասատրյանն ասել է, որ Ջինչարաձեն սխալ է եւ պետք է ներողություն խնդրի Արտյոմից։ Այս բախումների ֆոնին ներկաները հիշել են Ռամազի եւ Զվիադ Պապիաշվիլիի երկարամյա հակամարտությունը։
2021 թվականին Արտյոմ Սարատովսկին վիճել էր Հայկ Սարգսյանի (Հայկո Աստրախանսկի) հետ՝ չվճարված խաղային պարտքի մասին բամբասանքների պատճառով։ Նրանք հաշիվները պարզել էին Լեհաստանում (որտեղ ապրում է Հայկոն)՝ հանցավոր աշխարհի այլ հեղինակավոր ներկայացուցիչների՝ Մամուլոյի, Սոպոտիայի, Վաթիայի, Կորսագիայի եւ Լեւան Փերաձեի ներկայությամբ։ Արտյոմը Հայկոյից ներողություն էր պահանջել, սակայն վերջինս հրաժարվել էր։ Մնացած գողերը նրան դատապարտել էին, քանի որ նա իրավունք չուներ զրպարտել օրենքով գողին։ Արտյոմը Հայկոյին ասել էր, որ նա գող չէ, եւ իր կարծիքը հիմնավորելու պատրաստակամություն էր հայտնել։ Արդյունքում հակամարտությունը կարգավորվել էր Էդիկ Ասատրյանի աջակցությամբ։
