Կյանքից անժամանակ հեռացել է լրագրող, հաղորդավար Գայանե Փայտյանը: Փայտյանը առողջական լուրջ խնդիրներ ուներ և բարդ վիրահատության էր ենթարկվել: Նա ունի 2 մանկահասակ երեխա՝ երկվորյակ աղջիկներ:
Գայանե Ալբերտի Փայտյանը ծնվել է 1974թ. հունիսի 30-ին, Երևանում։
1991թ. Գայանեն ընդունվում է Երևանի պետական համալսարանի բանասիրական ֆակուլտետի ժուռնալիստիկայի բաժին։ Սկսում է թղթակցել «Ավանգարդ» թերթին։
1993թ. սրտի կաթվածից մահանում է հայրը։ Դա լուրջ հարված էր Գայանեի համար. հայրն առանձնահատուկ դեր ուներ նրա կյանքում՝ իր գաղափարակիցն էր, թիկունքը, հենարանը։ Ընտանիքի համար ծանր օրեր են սկսվում.
19-ամյա Գայանեն ուսմանը զուգահեռ տարբեր աշխատանքներ է կատարում վատառողջ մոր և 5-ամյա քրոջ ապրուստն ապահովելու համար։ Նույնիսկ տպարանում գիշերային ժամերին սևագործ բանվոր է աշխատում՝ տառերի շարվածքն անում։ Դա այն դեպքում, երբ նա արդեն հեռուստատեսության աշխատակից էր, շատերի համար արդեն ճանաչելի դեմք, բայց բանվորի աշխատանքից չէր խորշում ու չէր ամաչում. ընտանիքի բեռը երիտասարդ աղջկա ուսերին էր։
1991թ., երբ դեռ առաջին կուրսի ուսանող էր, աշխատանքի էր ընդունվել Հայաստանի ազգային հեռուստաընկերությունում։ Այսպիսով, 1991-92թթ եղել է Հայաստանի ազգային հեռուստաընկերության «Մայրաքաղաք» հաղորդման մեկնաբանը, 1992-94թթ` «Ա1» հեռուստաընկերության «Թափանցիկ դռներ», «Հաու դու յու դու», «Մամուլի ակումբ» հաղորդումների թղթակիցը, հեղինակը և հաղորդավարը։
1994թ. մասնակցում է Ֆրանսիայի Պոռ դը Բուք քաղաքում անցկացվող ամենամյա միջազգային կինոփառատոնին և Երևանի կենդանաբանական այգու մասին պատմող տեսաֆիլմով ընդգրկվում մասնակիցների լավագույն հնգյակում։
1996թթ. Գայանեն ավարտում է համալսարանը, գերազանց պաշտպանում ավարտական աշխատանքը։ Նրա դեմքն ու ձայնն արդեն ճանաչելի էր հեռուստադիտողի համար։ Ազգային հեռուստաընկերության նոր ղեկավարությունը որոշում է փոխել եթերային քաղաքականությունը. Գայանեն, չհամաձայնելով պարտադրվող փոփոխություններին, որոշում է կայացնում հեռանալ։
Տեղափոխվում է նոր հիմնադրված «Նորք» հեռուստաընկերություն (հայկական երկրորդ պետական հեռուստաընկերություն)։ 1998-99թթ եղել է «Նորք» հեռուստաընկերության «Լուրեր» ծրագրի տնօրենը և «Արտ 13» հեռուստաընկերության խմբագիրը, հեղինակել և վարել է «Ծանոթ անծանոթ» հաղորդաշարը։
2006թ. ԱՄՆ Պետդեպարտամենտի լրատվամիջոցների համար հատուկ ծրագրով վերապատրաստվել և որակավորվել է ԱՄՆ-ում, իսկ 2009թ. դարձյալ ԶԼՄ ներկայացուցիչների համար հատուկ ծրագրով վերապատրաստվել է Եգիպտոսում, մասնակցել է միջազգային բարձրակարգ դասընթացների եվրոպական մի շարք երկրներում։
Բազմաթիվ դոկումենտալ ֆիմերի հեղինակ է` «Հայաստանի և Արցախի պատմական վանքերն ու հուշարձանները», «Հնդկաստան», «Իրանի Իսլամական Հանրապետություն», «Մեր հարևանները», «Իրաք», «Բաբելոնի գաղտնիքները», «Բահրեյնի թագավորության հրաշքը», «Քուվեյթ», «Ալբանիա. պատերազմ և խաղաղություն», «Հռոմ՝ հավերժական քաղաք», «Փարիզ. սեր ու գույն» և այլն։
Որպես լրատվական մեկնաբան, 1995-99թթ աշխատել է Հայաստանի ազգային հեռուստաընկերությունում, 1999-2015թթ՝ Հայկական Երկրորդ հեռուստաալիքի «Լրաբեր» լրատվական ծրագրում։ 2000-2008թթ եղել է ՀՀ Ազգային Ժողովի հասարակայնության հետ կապերի վարչության գլխավոր մասնագետը։ 2004թ-ից միջազգային հեռուստատեսային ակադեմիայի անդամ է։ 2006թ. Հայկական Երկրորդ հեռուստաալիքով հեղինակել և վարել է «Կախման կետեր», 2017թ. մինչ օրս՝ «Զրույց Փայտյանի հետ» հաղորդաշարերը։ Տարբեր տարիներին դասախոսել է Հայաստանի Ֆրանսիական և Երևանի Խ.Աբովյանի անվան պետական մանկավարժական համալսարաններում։
2008թ. հիմնադրել և ղեկավարում է հաղորդավարների և լրագրողների մասնագիտացված «TV Իդեալ» դպրոց-ստուդիան։
Մասնագիտական ակտիվ գործունեության, բարձր պրոֆեսիոնալիզմի համար Գայանե Փայտյանն արժանացել է Երևանի քաղաքապետի պատվոգրին, ստացել է բազմաթիվ շնորհակալագրեր։
2009թ. Գայանեն ամուսնացել է մասնագիտությամբ ինժեներ Էդուարդ Միհրանյանի հետ։
