Հայաստանի Հանրապետության պաշտպանության նախարար Վիգեն Սարգսյանի հայտարարությունն իր արդյունքը տվել է. զինծառայող Ալբերտ Դալլաքյանի վիրահատության համար մի քանի օրում արդեն հավաքվել է 30 հազար դոլար: «Արմենպրես»-ի հաղորդմամբ` հունվարի 16-ին լրագրողների հետ հանդիպմանն այս մասին ասաց «Դիրքապահ» քառօրյա պատերազմի մասնակիցների միավորում» ՀԿ նախագահ, Ալբերտի մարտական ընկեր Մանուել Մանուկյանը:
«Ալբերտի անունից փոխանցում ենք շնորհակալություն բոլոր այն մարդկանց, ովքեր այս կարճ ժամանակահատվածում նպաստեցին, որպեսզի հավաքվի այդքան գումար: Ալբերտին անհրաժեշտ է 45 հազար եվրո միայն վիրահատության համար, այսինք՝ մոտ 49 հազար դոլար: Ներկայումս 30 հազար դոլար հավաքվել է և մոտ 19 հազար դոլար անհրաժեշտ է:
Կոչ ենք անում մեր հայրենակիցներին մի կողմ թողնել բոլոր խոսակցությունները և միանալ զինծառայող Ալբերտ Դալլաքյանի վիրահատության համար կազմակերպված դրամահավաքին»,- նշեց Մանուկյանը:
Նրա խոսքով`այս դրամահավաքը վաղուց էր սկսվել` Ալբերտի մայրը հաշվահամար ուներ բացված, սակայն ակտիվություն չկար:
«Մինչև Պաշտպանության նախարարի հայտարարությունը հավաքվել էր ընդամենը 500 հազար դրամ: Հայտարարարությունից հետո մի քանի օրում կարողացանք հավաքել 30 հազար դոլար»-, ասաց Մանուկյանը:
Հունվարի 13-ին Հայաստանի պաշտպանության նախարար Վիգեն Սարգսյանը միացել էր զինծառայող Ալբերտ Դալլաքյանի վիրահատության համար կազմակերպված դրամահավաքին` բոլորին կոչ անելով ևս հնարավորության դեպքում միանալ:
