Ուկրաինայի առաջին տիկին Ելենա Զելենսկայան արձագանքել է Ուկրաինայի տարածքում ռուսական զորքի հրթիռային հարվածներին։ Այդ մասին նա գրել է Telegram-ում։
Մասնավորապես, պետության ղեկավարի կինը տեսանյութ է հրապարակել, թե ինչպես են կիևցիները ռմբակոծության ժամանակ երգում մետրոյում։
«Այս առավոտվա բոլոր փորձություններից հետո. Կիևի, Դնեպրի, Զապորոժիեի, Խմելնիցկիի, Լվովի, Վիննիցայի, Ֆրանկիվսկի, Զապորոժիեի, Սումիի, Խարկովի, Ժիտոմիրի, Կիրովոգրադի շրջանների՝ ռուսական բարբարոսական ռմբակոծությունից հետո… Բայց ուկրաինացիները երգում են: Ինձ համար այս տեսանյութը շատ բան է պատմում մեր մասին»,- ասել է առաջին տիկինը։
Բացի այդ, Զելենսկայան ընդգծել է, որ Ուկրաինան գործ ունի «ահաբեկչական երկրի հետ, որը ցանկանում է միայն ոչնչացնել և վախեցնել»։
«Մենք գործ ունենք ահաբեկչական Ռուսաստանի հետ, որը, ինչպես միշտ, ցանկանում է միայն ոչնչացնել և վախեցնել: Սա սովորական ահաբեկչական մարտավարություն է: Նրանք պայքարում են վնասելու համար: Մենք պետք է պաշտպանենք և փրկենք ամենաթանկը: Այսպիսով, ուկրաինացիները երգում են կրակի տակ, քանի որ չեն վախենում: Ուկրաինացիները երգում են, որովհետև ճշմարտությունն իրենց կողմն է։ Ուկրաինացիները երգում են, որովհետև հաղթում են և գիտեն դրա մասին»,- ամփոփել է Վլադիմիր Զելենսկու կինը։
