Չեչնիայի ղեկավար Ռամզան Կադիրովը կոչ է արել ցածր հզորության միջուկային զենք օգտագործել Կրասնի Լիմանից զորքերի հեռանալուց հետո։
Ավելի վաղ ՌԴ ՊՆ-ն հայտնել էր, որ դաշնակից զորքերը Կրասնի Լիմանից դուրս են բերվել առավել շահավետ գծեր՝ շրջապատման սպառնալիքի պատճառով։
«Ես միշտ ասել եմ՝ բարձրաձայնված ճշմարտությունից լավ բան չկա, թեկուզ դառը, վիրավորական, բայց ճշմարտություն։ Միայն այդպես կարելի է առաջ շարժվել։ Ուստի ես չեմ կարող լռել այն մասին, ինչ տեղի է ունեցել Կրասնի Լիմանում։
Այս հատվածի պաշտպանությունը ղեկավարել է Կենտրոնական ռազմական օկրուգի հրամանատար, գեներալ-գնդապետ Ալեքսանդր Լապինը։ Նույն Լապինը, որը Լիսիչանսկի գրավման համար Ռուսաստանի հերոսի աստղ է ստացել, թեեւ դե ֆակտո նա այնտեղ նույնիսկ մոտակայքում չի եղել: Լապինի ենթակայությանն են հանձնել նաեւ Արեւմտյան ռազմական օկրուգի զորքերին։
Գեներալ-գնդապետը ԼԺՀ-ից մոբիլիզացված զինվորներին եւ այլ ստորաբաժանումներ տեղակայել է Լիմանի ուղղության բոլոր սահմաններում, սակայն նրանց չի տրամադրել անհրաժեշտ կապ, փոխգործակցություն եւ զինամթերքի մատակարարում: Դեռեւս երկու շաբաթ առաջ այն, որ մեր մարտիկները կարող են հեշտ թիրախ դառնալ, ինձ անձամբ զեկուցեց «Ախմատ»-ի հատուկ նշանակության ջոկատի գեներալ-մայոր, իմ սիրելի ԵՂԲԱՅՐ Ապտի Ալաուդինովը։ Իր հերթին ես վտանգի մասին տեղեկացրեցի Ռուսաստանի Դաշնության զինված ուժերի գլխավոր շտաբի պետ Վալերի Գերասիմովին։ Բայց գեներալը վստահեցրեց ինձ, որ չի կասկածում Լապինի հրամանատարական տաղանդին եւ չի կարծում, որ Կրասնի Լիմանում եւ նրա շրջակայքում հնարավոր է նահանջ լինի։
Մեկ շաբաթ անց Լապինն իր շտաբը տեղափոխում է Ստարոբելսկ՝ իր ենթականերից հարյուր կիլոմետր հեռավորության վրա, իսկ ինքը նստում է Լուգանսկում։ Ինչպե՞ս կարելի է օպերատիվ կերպով կառավարել ստորաբաժանումները՝ գտնվելով նրանցից 150 կմ հեռավորության վրա: Տարրական ռազմական լոգիստիկայի բացակայության պատճառով այսօր մենք թողել ենք մի քանի բնակավայրեր եւ տարածքի մի մեծ հատված։
Ցավալի է ոչ թե այն, որ Լապինը ապիկար է։ Այլ այն, որ նրան վերեւում հովանավորում են գլխավոր շտաբի ղեկավարները։ Եթե ինձ մնար, ես Լապինին կիջեցնեի մինչեւ շարքային, կզրկեի նրան պարգեւներից եւ ավտոմատը ձեռքին կուղարկեի առաջնագիծ՝ ամոթը արյունով լվանալու։
Դոնեցկը դեռ գնդակոծվում է։ Միացված 4 տարածքների բնակիչները ուզում են պաշտպանված լինել։
Ես չգիտեմ, թե ինչ է հաղորդում ՌԴ ՊՆ-ն Գերագույն գլխավոր հրամանատարին, բայց իմ անձնական կարծիքով, պետք է ավելի կտրուկ միջոցներ ձեռնարկել՝ ընդհուպ սահմանամերձ շրջաններում ռազմական դրության հայտարարում եւ ցածր հզորության միջուկային զենքի կիրառում։ Պետք չէ ամեն որոշում ընդունել արեւմտաամերիկյան համայնքին նայելով, այն արդեն շատ բան է ասել ու արել մեր դեմ։
Երեկ շքերթ Իզյումում, այսօր դրոշ Լիմանում, իսկ վաղը ի՞նչ։
Ամեն ինչ լավ կլիներ, եթե այդքան վատ չլիներ»,- գրել է նա իր Telegram-ալիքում։
