ԱԺ փոխնախագահ Ռուբեն Ռուբինյանը Ազատությանը տված հարցազրույցում անդրադարձել է մի քանի օրից Պրահայում սպասվող Էրդողան-Փաշինյան հնարավոր հանդիպմանը․ «Օրակարգը Հայաստան-Թուրքիա կարգավորման գործընթացն է լինելու, մեր դիրքորոշումները այս առումով չեն փոխվել»։
Ռուբինյանը վերջին անգամ Թուրքիայի հատուկ ներկայացուցիչ Քըլըչի հետ հանդիպել էր հուլիսին, երբ ձեռք էր բերվել հայտնի պայմանավորվածությունը՝ երրորդ երկրների քաղաքացիների համար սահմանների բացման և բեռնափոխադրումների հնարավորության ստեղծման մասին։ Առաջիկա հանդիպումների մասին խոսելով՝ ԱԺ փոխնախագահը տեղեկացրել է․ «Իրականում սեպտեմբերի 14-ին սահմանին պետք է տեղի ունենար հանդիպում երկու երկրների համապատասխան գերատեսչությունների ներկայացուցիչների միջև, բայց դա Ադրբեջանական հարձակման օրերն էին և թուրքական կողմի ցանկությամբ այդ հանդիպումը անժամկետ հետաձգվել է։ Այն ինչ պայմանավորվել ենք պետք է իրագործվի, ի վերջո կա քաղաքական պայմանավորվածություն և քաղաքական պատասխանատվություն»։
