2022թ–ին Հայաստանից Թուրքիա արտահանումներն անցյալ տարվա նույն ժամանակահատվածի համեմատ գրեթե 200 անգամ ավելացել են։ ՀՀ պետական եկամուտների կոմիտեի հրապարակած պաշտոնական վիճակագրության համաձայն` եթե 2021թ–ի առաջին կիսամյակում Հայաստանը Թուրքիա էր արտահանել 106 000 ԱՄՆ դոլարի ապրանք, ապա 2022թ–ի առաջին կիսամյակում` 20 377 800 դոլարի։
Ընդ որում` Թուրքիա արտահանված ապրանքների գերակշիռ մասը ոսկին է, ոսկերչական իրերն ու թանկարժեք, կիսաթանկարժեք քարերը։
20 377 800 դոլարից 20 167 100–ը եղել են ոսկին, պլատինն ու ոսկու փոշին (ընդհանուր` 353,1 կգ), 5 900 դոլարը պատրաստի ոսկերչական իրերն են (0,2 կգ), 14 700 դոլարը` թանկարժեք ու կիսաթանկարժեք քարերը (17.9 կարատ)։
Համեմատության համար նշենք, որ 2021թ–ի առաջին կիսամյակում Հայաստանից Թուրքիա ո՛չ ոսկի–ոսկեղեն է արտահանվել, ո՛չ էլ թանկարժեք ու կիսաթանկարժեք քարեր։
Բացի այդ, այս տարի արտահանվել է նաև 115 400 դոլարի խոշոր եղջերավոր անասունների դաբաղած կաշի (ընդհանուր` 13 000 հատ)։ Այս ապրանքի արտահանումը ևս այս տարի էապես ավելացել է. 2021թ–ի առաջին կիսամյակում 6 500 դոլարի անմշակ կաշի էր արտահանվել, ընդամենը` 1 200 հատ։
Այս հանգամանքը հետաքրքրական է նրանով, որ 2022թ–ի հունվարից չեղարկելով թուրքական ապրանքների ներմուծման էմբարգոն` ՀՀ կառավարությունը որոշեց ևս մեկ տարի` մինչև 2023թ–ի հունվար ուժի մեջ թողնել կաշվի ներկրման արգելքը։ Նպատակը տեղական կաշվի ու մորթու մշակումը խթանելն էր, քանի որ մորթված անասունների կաշին «ջրի գնով» արտահանվում էր Հայաստանից, դրսում մշակվում ու անհամեմատ թանկացած դարձյալ վերադառնում Հայաստան` հիմնականում կոշիկի արտադրության համար։
ՊԵԿ պաշտոնական թվերը վկայում են, որ Հայաստանը թեև փոքր քանակով, բայց նաև սկսել է սեփական արտադրության կաշի արտահանել, այդ թվում` Թուրքիա։
