Թուրքիայի նախագահը մեղադրել է Հունաստանին Ատտիկայի հարավ-արևելյան մասում գտնվող Լավրիո քաղաքի ներգաղթյալների ճամբարում ահաբեկիչներին ապաստան տալու համար՝ միաժամանակ պնդելով, որ Արևմտյան Թրակիայում և կղզիներում տեղակայված զենքերը ոչինչ չեն նշանակում Անկարայի համար, գրում է greekcitytimes.com-ը:
«Ահաբեկիչները պաշտպանված են Եվրոպայի գրեթե բոլոր երկրներում, հատկապես Հունաստանի Լավրիոյի ճամբարում», — ասել է Թուրքիայի նախագահը` նշելով, որ ահաբեկիչները սպառնալիք են արևմտյան երկրների խաղաղությանն ու անվտանգությանը:
«Մենք ակնկալում ենք, որ բոլոր երկրները, հատկապես հարևանները, համապատասխան միջոցներ կձեռնարկեն ահաբեկչական կազմակերպությունների դեմ»,- հավելել է նա։
Շարունակելով Հունաստանի թեման՝ նա ասել է.«Մենք լավ գիտենք Հունաստանին դրդողների մտադրությունները… Արևմտյան Թրակիայում և կղզիներում կուտակվող զենքերը մեզ համար ոչինչ չեն նշանակում։ Մեր ուժը շատ ավելին է նրանցից»։
Միաժամանակ Էրդողանը սպառնացել է՝ «Ամերիկայի աջակցությունը ձեզ չի փրկի»։
