ՀՀ ԶՈՒ Գլխավոր շտաբի նախկին պետ Մովսես Հակոբյանը «Ազատության» հետ զրույցում անդրադարձել է Արցախի Հանրապետության պաշտպանության նախկին նախարար-Պաշտպանության բանակի նախկին հրամանատար, Արցախի Հանրապետության նախագահի գործող գլխավոր խորհրդական Միքայել Արզումանյանին քրեական հետապնդման ենթարկելու փաստին։
Մովսես Հակոբյանը նշել է՝ մի բանում վստահ է՝ Արզումանյանն այս ամենին արժանի չէր, նա լավ զինվորական է, իսկ պատերազմի վերջում Պաշտպանության բանակի ղեկավարի պաշտոնը ստանձնելիս ամեն ինչ արդեն կանխորոշված էր։
«Առնվազն ազնիվ չէ Արզումանյանին մեղադրանք առաջադրել, որովհետև նա բանակն ընդունեց այն պահին, երբ որ ամեն ինչ արդեն կանխորոշված էր: Երկրորդը` որևէ մեկը չի կարող գնահատական տալ հրամանատարին՝ այդ պահին ստեղծված իրավիճակում ճի՞շտ է որոշում կայացրել, թե՞ սխալ: Ես ինքս ինձ այդպիսի, թեկուզ եղել եմ Արզումանյանի վերադասը, այդպիսի իրավունք չէի վերապահի, որ ասեմ` այդ պահին ճիշտ որոշում է կայացրել, թե սխալ, որովհետև հազար ֆակտորներ կան, որոնք ազդում են այդ պահին որոշման վրա», — ասել է Մովսես Հակոբյանը։
