ԱԺ «Հայաստան» խմբակցության ղեկավար Սեյրան Օհանյանն այսօր լրագրողների հետ ճեպազրույցում անդրադարձավ ԱԱԾ նախագծին, ըստ որի՝ անցակետեր են ստեղծվելու Սյունիքի, Գեղարքունիքի ու Արարատի մարզերում։ Ըստ նրա՝ ԱԱԾ-ն պետք է պարզաբանի հանրությանը, թե որ հատվածում որ երկրի համապատասխան ծառայություններն են տեղակայվելու։
«Բայց դիտարկելով այն հատվածները, որոնց մասին դուք հարցրեցիք, դա խոսում է այն մասին, որ համապատասխան ենթակառույցների, ճանապարհների, ինչու չէ, նաև Ադրբեջանի կողմից ասված միջանցքի տրամաբանության ներքո է դա իրականացվում։ Դա անել՝ շրջանցելով այն բոլոր ընթացակարգերը, որոնք կան ՀՀ-ում, ես գտնում եմ, որ անընդունելի է։ Հայաստանում կա Ազգային ժողով, որն օրենսդիր մարմինն է, և գործադիրը պատասխանատու է օրենսդիրի առջև։ Այսինքն՝ առանց օրենսդիրի հետ համաձայնեցնելու, առանց համապատասխան հանձնաժողովների գործունեության նման քայլեր իրականացնելը մեզ համար անընդունելի է»,- ասաց նա։
