Երեկ Փաշինյանը և Ալիևը զանգեր են ստացել ԱՄՆ պետքարտուղար Էնթոնի Բլինքենից, Ֆրանսիայի նախագահ Մակրոնից և Եվրոպական խորհրդի ղեկավար Շառլ Միշելից։
Նիկոլ Փաշինյանը մտահոգություն է հայտնել 2020 թվականի նոյեմբերի 9-ի եռակողմ հայտարարության դրույթներից Ադրբեջանի նահանջի կապակցությամբ, ինչպես նաև վերահաստատել Հայաստանի դիրքորոշումները տարածաշրջանային խաղաղության և կայունության վերաբերյալ։
«Պետքարտուղար Բլինկենը կոչ է արել ուղիղ երկխոսություն սկսել Հայաստանի և Ադրբեջանի միջև՝ լուծելու Լեռնային Ղարաբաղի հակամարտության հետ կապված կամ դրանից բխող հարցերը», – ասվում է Պետդեպարտամենտի մամուլի հաղորդագրության մեջ։
Փաշինյանի վարչակազմն ընդհանրապես չի հաղորդել Ֆրանսիայի նախագահի հետ զրույցի մասին։ Ըստ Ելիսեյան պալատի, Մակրոնն ընդգծել է 2020 թվականի նոյեմբերի 9-ի հրադադարի մասին հայտարարությամբ ստանձնած պարտավորությունների կատարման կարևորությունը։ Միևնույն ժամանակ, «Ֆրանսիան պատրաստ է նպաստել Հայաստանի և Ադրբեջանի միջև երկխոսությանն ուղղված ջանքերին՝ հանուն տարածաշրջանում կայունության», – ասվում է Ելիսեյան պալատի հայտարարության մեջ։
Ալիեւը Մակրոնի հետ զրույցում ասել է, որ ՌԴ ՊՆ-ի հետ համաձայնեցրել է Լաչինի միջանցքի երթուղին փոխելու հարցը։ Օգոստոսի 2-ին՝ Բաքվի ագրեսիայի նախօրեին հեռախոսով զրուցել են Ռուսաստանի և Ադրբեջանի պաշտպանության նախարարները։
Ավելի վաղ Կրեմլը եւ ՌԴ ԱԳՆ-ն կոչ էին արել ոչ միայն կատարել եռակողմ պայմանավորվածությունները, այլեւ դրանք իրականացնել բացառապես եռակողմ ձեւաչափով։
ԱՄՆ-ն պնդում է «ուղիղ» բանակցությունները, ինչպես Բլինկենն է ասել, այսինքն՝ «եռակողմ ձևաչափից» դուրս։ Նման մեկ հանդիպում արտգործնախարարների մակարդակով կայացել է Թբիլիսիում։ Մոսկվան դիմադրում է դրան։
Հայաստանի իշխանությունները, շարունակելով պնդել ռուս-թուրքական «եռակողմ» պայմանավորվածությունների կատարումը, ըստ էության, շարունակում են ճանապարհը դեպի Արցախի և հայկական պետականության կորուստ։ Անցում «ուղիղ» բանակցությունների նշանակում է եռակողմ պայմանավորվածությունների զրոյացում, պատերազմի արդյունքների չճանաչում և քաղաքական կարգավիճակի քննարկում։ Հայաստանի իշխանությունները երաշխավորում են պատերազմի արդյունքը ճանաչող և Արցախի կարգավիճակը բացառող եռակողմ պայմանավորվածությունների իրականացումը։
Հայաստանի իշխանությունները Թայվանի կամ Ուկրաինայի իշխանություններ չեն, որոնք ձգտում են պահպանել ինքնիշխանությունը և դրա համար օգտագործում են բոլոր հնարավորությունները։
Lragir.am
