Լավրովի Բաքու այցից մի քանի օր առաջ Մարիա Զախարովան կրկին հայտարարել է, որ «հայ-ադրբեջանական սահմանի սահմանազատման և սահմանագծման հանձնաժողովի գործունեությունը կապ չունի Լեռնային Ղարաբաղի Ասկերանի շրջանի ռուսական խաղաղապահ կոնտինգենտի պատասխանատվության գոտում գյուղի շուրջ ստեղծված իրավիճակի հետ»։
Հիշեցնենք, որ Լավրովը Երևանում Արարատ Միրզոյանի հետ համատեղ ասուլիսում, պատասխանելով Փառուխի հարցում ռուսական կոնտինգենտի պատասխանատվության մասին հարցին, ասել էր, որ այդ հարցերը կլուծվեն սահմանազատման աշխատանքների շրջանակներում։
Բաքվի ԱԳՆ-ն բողոքել էր, որից հետո ՌԴ ԱԳՆ-ն իր կայքում սրբագրել էր Լավրովի խոսքերը։ Լավրովի` հունիսի 24-25-ը Բաքու այցի նախօրեին Մարիա Զախարովան կրկնեց ՌԴ ԱԳՆ պարզաբանումը։
Հայաստանում ծավալվող իրադարձությունները վկայում են, որ Լավրովը նոր կոշտ հրահանգներ է տվել հայկական իսթեբլիշմենտին՝ ամեն ինչ արդեն որոշված է։ Լավրովի հեռանալուց անմիջապես հետո արդեն մի քանի ամիս փողոցային ակցիաներ անցկացնող խորհրդարանական ընդդիմությունը Ֆրանսիայի հրապարակից հավաքեց վրանները՝ չհայտարարելով նոր նպատակներ։
Նիկոլ Փաշինյանն իր հերթին ելույթ ունեցավ խորհրդարանում՝ կրկին մեղադրելով նախկին իշխանություններին Արցախը հանձնելու մեջ՝ դրանով իսկ չհերքելով, որ Արցախը հանձնել են։ Նա չբացառեց նաեւ, որ իր խաղաղության օրակարգը կարող է չհաջողվել, «որովհետև խաղաղությունը միակողմանի շարժում չէ, այլ համագործակցության արդյունք»։ Լավրովն ասե՞լ է Փաշինյանին, որ ոչ մի խաղաղություն չի նախատեսվում, և ժամանակն է փոխել մարտավարությունը։
«Մենք պատրանքներ չունենք և տեսնում ենք, որ մեզ ոչնչացնել ցանկացողների թիվը մեծ է, ավելի մեծ, քան կարելի է ենթադրել։ Եվ խաղաղության օրակարգը մեզ ոչնչացնելու, աշխարհում գոյություն ունեցող ցանկությունները կառավարելու և չեզոքացնելու փորձ է»,- ասել է Փաշինյանը։ Միաժամանակ նա նշել է, որ «հակառակ ճանապարհը տանում է ոչ միայն Լեռնային Ղարաբաղի, այլև Հայաստանի կործանման»։
Փաշինյանը հանրությանը կոչ է արել համախմբվել «խաղաղության օրակարգի» շուրջ։ Երևում է Մոսկվային Երևանում առճակատում այլեւս պետք չէ, որի ժամանակ ուղիղ մեղադրանքներ են հնչում Մոսկվայի հասցեին։ Հիմա Մոսկվային Երևանում «համախմբում» է պետք. ժամանակն է, որ ողջ ժողովուրդը որոշում կայացնի Հայաստանի վերացման մասին և շնորհակալություն հայտնի Պուտինին։
Լավրովը մեկնում է Բաքվին զեկուցելու, որ Երեւանում «եռակողմ համաձայնագրերին» ոչինչ չի սպառնում։
Lragir.am
