Հայաստանն ու Ադրբեջանը ներկայումս հարաբերությունների կարգավորման գործընթացում առաջընթացի հնարավորություն ունեն։ Այս մասին հայտարարել է ԱՄՆ պետքարտուղարի Եվրոպայի և Եվրասիայի հարցերով օգնական Քարեն Դոնֆրիդը օտարերկրյա լրագրողների համար ճեպազրույցի ժամանակ։ Նրա խոսքը մեջբերում Է ՏԱՍՍ-ը։
«Ես կարծում եմ, որ հիմա իրական հույս կա, բարենպաստ հնարավորություն կա Ադրբեջանի և Հայաստանի համար՝ հարաբերությունները նորմալացնելու և խաղաղ կարգավորման որոնման հարցում»,- հայտարարել է ԱՄՆ Պետդեպի ներկայացուցիչը։
Նա ավելացրել է, որ երկու երկրներն էլ «կարևոր քայլեր են արել» այդ ուղղությամբ։
«ԱՄՆ-ն լիովին խրախուսում է դա»,- ընդգծել է Դոնֆրիդը։
Հիշեցնենք՝ մայիսի 22-ին Բրյուսելում տեղի է ունեցել Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպումը Եվրախորհրդի նախագահ Շառլ Միշելի միջնորդությամբ:
Կողմերը, մասնավորապես, պայմանավորվածություն են ձեռք բերել երկու երկրների պետական սահմանին սահմանազատման սահմանային հանձնաժողովների առաջին նիստն անցկացնելու վերաբերյալ: Մայիսի 24-ին երկու երկրների սահմանին տեղի է ունեցել Հայաստանի և Ադրբեջանի փոխվարչապետների հանդիպումը՝ սահմանազատման հանձնաժողովների ձևաչափով:
