Քաղաքագետ Երվանդ Բոզոյանը Sputnik Արմենիայի եթերում անդրադարձել է նախօրեին Բրյուսելում տեղի ունեցած Փաշինյան-Միշել-Ալիև հանդիպմանը։
Ղարաբաղյան հիմնախնդիրն արդեն վերածվել է լոկ էթնիկ հայերի անվտանգության պահպանության հարցի։ 20 տարվա ամբողջ աշխատանքը, մադրիդյան սկզբունքները փաստացի դուրս են եկել օրակարգից, և միայն մնացել է արցախահայության անվտանգության հարցը։ Sputnik Արմենիայի հետ զրույցում վերլուծելով երեկ Բրյուսելում կայացած Փաշինյան-Միշել-Ալիև հանդիպումը, ասաց քաղաքագետ Երվանդ Բոզոյանը
Նրա խոսքով` այս ամենն այսօրվա ՀՀ իշխանության վարած արտաքին քաղաքականության լիակատար տապալումն է, որը սպառնում է ոչ միայն Արցախի, այլև Հայաստանի անվտանգությանը։
«Նախ պետք է հաշվի առնել, թե ինչ սկզբունքներ են դրվել տվյալ հանդիպման հիմքում, որովհետև Եվրոպական խորհրդի նախագահ Շառլ Միշելի խոսքում կային մի շարք վտանգավոր դրվագներ։ Նա փաստացիորեն նշեց, որ Արևմտյան Ադրբեջանի ու Նախիջևանի միջև կապուղիների խնդիրն անհրաժեշտ է լուծել այնպես, ինչպես պետք է լուծվի ՀՀ տարբեր շրջանների միջև կապի հարցը, որն անցնում է Ադրբեջանի տարածքով։ Այսինքն` կողմերը նույնիսկ քննարկել են այն տարբերակը, որ այսպես կոչված «Զանգեզուրի միջանցքի» կարգավիճակը կարող է հավասար լինել այն ճանապարհի կարգավիճակին, որը պետք է միացնի Գորիսը Կապանին»,- ասաց քաղաքագետը։
Բոզոյանի կարծիքով` դժվար է ասել, թե հիմա սեղանին կդրվի ստորագրվելիք որևէ փաստաթուղթ, որովհետև աշխարհաքաղաքական զարգացումները ՌԴ-ի ու Եվրամիության միջև առաջացրել են մեծ լարվածություն, և կատաղի պայքար է գնում ուկրաինական ուղղությամբ։ Հետևաբար, չի բացառվում, որ նման պայքար կծավալվի նաև մեր տարածաշրջանում։
Ըստ նրա` բոլոր այն կետերի շուրջ, որոնք նշել էր Շառլ Միշելը, ընթացել են եռակողմ բանակցություններ նաև Հայաստանի, Ադրբեջանի ու Ռուսաստանի միջև, հետևաբար, Արևմուտքն ու ՌԴ-ն փորձելու են մրցակցել տվյալ գործընթացում որոշիչ դեր ստանձնելու համար։
Քաղաքագետի գնահատմամբ` մեզ համար ամենավտանգավորն այն է, որ կոնկրետ ղարաբաղյան հարցում Շառլ Միշելի կողմից ոչ մի հղում չկա նախկինում շրջանառված փաստաթղթերին, ուստի կարելի է ասել, որ Արցախի կարգավիճակի խնդիրը հավասարվել է միայն տեղի հայության անվտանգության պահպանման հարցին։
Նշենք, որ նախօրեին Բրյուսելում տեղի է ունեցել Հայաստանի Հանրապետության վարչապետ Նիկոլ Փաշինյանի, Եվրոպական խորհրդի նախագահ Շառլ Միշելի և Ադրբեջանի Հանրապետության նախագահ Իլհամ Ալիևի եռակողմ հանդիպումը։ Համատեղ քննարկման արդյունքում պայմանավորվածություններ են ձեռք բերվել տարածաշրջանային կոմունիկացիաների բացմանն ուղղված աշխատանքների հետագա ընթացքի, սահմանների սահմանագծման ու անվտանգության հարցերով հանձնաժողովի աշխատանքների մեկնարկի վերաբերյալ:
Քննարկման առարկա են դարձել նաև երկու երկրների միջև հարաբերությունների կարգավորման բանակցային գործընթացի նախապատրաստություններին, հումանիտար խնդիրներին, ինչպես նաև Լեռնային Ղարաբաղի հիմնախնդրի կարգավորմանը վերաբերող հարցեր:
Պայմանավորվածություն է ձեռք բերվել շարունակել եռակողմ հանդիպումները` նախատեսելով նմանատիպ հանդիպում անցկացնել հուլիսին կամ օգոստոսին:
