Հիմա շատերը չեն հիշում, որ Տավուշից 7 գյուղերի եւ Տիգրանաշենի(Քյարքի) հանձնումը 2020թ․ նոյեմբերի 9-ի հայտարարություն-կապիտուլյացիայի նախնական տարբերակի կետերից մեկն էր։
Այն ջնջել էին, քանի որ կարող էր դժգոհություն առաջացնել․ կապիտուլյացիա էին կնքում Արցախի վերաբերյալ,հանձնում նաեւ՝ Հայաստանից տարածքներ։ Նիկոլ Փաշինյանի խաղաղության օրակարգը կապիտուլյացիայի օրակարգ է,հիմա այդ սերիալի 2-րդ սերիան է ավարտվում, այն դրսից պարտադրված օրակարգ է, որն իրականացնելու համար 2018թվականի գարնանը թավշա հեղափոխություն կոչված դավադրությամբ իշխանության բերեցին Նիկոլ Փաշինյանին։
Ադրբեջանի բռնապետ Իլհամ Իլիեւի նպատակը Հայաստանը որպես պետություն վերացնելն է, այն դարձնել փոքր,սեղմված տարածք, որը իրենից գործոն չի ներկայացնում։ Այդ նպատակով Ադրբեջանը արդեն մեկ տարի իր զորքերը մտցրել է Սյունիքի եւ Գեղարքունիքի տարածքներ, տիրել կարեւոր ճանապարհերի վրա իշխող բարձունքներին, խմելու ջրի ակունքներին։
Տավուշի 7 գյուղերից Խերիմլիի, Աշաղի Ասքիպարայի(Ներքին Ոսկեպար) եւ Բաղանիս-Այրումի տարածքները գտնվում են Հայաստան-Վրաստան միջպետական ավտոճանապարհի Իջեւան-Նոյեմբերյան հատվածում, Սոֆուլլուն եւ Բարխուդարլուն՝ Իջեւան-Բերդ ավտոճանապարհին։
Այդ գյուղերի տարածքները հանձնելու դեպքում Բերդի, Իջեւանի եւ Նոյեմբերյանի սահմանագոտուց արտագաղթն ավելի է մեծանալու։ 4 տարի անընդհատ Տավուշի մարզի բնակչությանն զգուշացրել եմ այս վտանգների մասին, սակայն նրանց մեծամասնությունը չի հասկացել իրավիճակի լրջությունը, այլապես տարօրինակ պատերազմից եւ խայտառակ կապիտուլյացիայից հետո 2021թ․ հունիսի 20-ի ընտրություններում Նիկոլ Փաշինյանի ՔՊ-ին Հայաստանի մարզերի մեջ ամենաբարձր տոկոսներով քվե չէր տա։
Լրագրող Ոսկան Սարգսյան
