Հավաք Ծառուկյանի մոտ ԱԺ միջադեպից հետո

Ազգային ժողովի Ծառուկյան դաշինք խմբակցության պատգամավորներն այսօր ԱԺ նիստը չավարտված՝ խմբով դուրս են եկել խորհրդարանի շենքից ու գնացել խմբակցության ղեկավար Գագիկ Ծառուկյանի հետ հանդիպման: Խմբակցության պատգամավորներին, ըստ տեղեկությունների, հանդիպման է կանչել Գագիկ Ծառուկյանը:
Պատգամավոր Իվետա Տոնոյանն ասել է, որ գնում են Ծառուկյանի հետ հանդիպման, բայց թե որն է հանդիպման թեման, չի մանրամասնվել:
Հիշեցնենք, որ այսօր Ծառուկյան դաշինք խմբակցության պատգամավորների մասնակցությամբ միջադեպեր էին եղել խորհրդարանում: Նախ պատգամավոր Նապոլեոն Ազիզյանն էր կողմ քվերակել Դատական օրենսգրքի փոփոխությունների նախագծին, ինչը բուռն բանավեճի թեմա էր դարձել, հետո էլ վեճի էին բռնվել խմբակցության պատգամավորներ Արթուր Մանուկյանն ու Սերգեյ Բագրատյանը: