Երևանն ու Բաքուն քննարկել և արդեն համաձայնեցրել են՝ ինչ կառուցվածք է ունենալու սահմանազատման և սահմանային անվտանգության հարցերով երկկողմ հանձնաժողովը: Պայմանավորվածությունը ձեռք է բերվել երկու երկրների արտգործնախարարների այսօրվա հեռախոսազրույցում, հաղորդում է Հայաստանի արտաքին քաղաքական գերատեսչությունը:
Բացի այդ Արարատ Միրզոյանն ու Ջեյհուն Բայրամովը պայմանավորվել են հանդիպել, թե երբ է կայանալու այդ հանդիպումը, պաշտոնապես դեռ չի հաղորդվում, չի հստակեցվում նաև, թե հանձնաժողովն ինչ կառուցվածք է ունենալու:
Դեռ երեկ ԱԱԾ տնօրենի տեղակալ Տիգրան Հարությունյանը լրագրողների հետ զրույցում ասել էր, որ հանձնաժողովի ստեղծման և կազմի մասին տեղեկություններ չունի: Մինչդեռ Ադրբեջանի նախագահ Իլհամ Ալիևը այսօր հայ-ադրբեջանական հարաբերությունների գծով Մոսկվայի հատուկ բանագնաց, Մինսկի խմբի նախկին համանախագահ Իգոր Խովաևի հետ հանդիպմանն ասել է, որ Բաքուն արդեն իսկ նշանակել է խաղաղ պայմանագրի բանակցություններում Ադրբեջանը ներկայացնող պատվիրակության անդամներին, ինչպես նաև հստակեցրել է դեմարկացիայի և դելիմիտացիայի հարցերով հանձնաժողովի ադրբեջանական կազմը։
