ԱՄՆ-ն ձգտում է միաբևեռ աշխարհի՝ հույս ունենալով այն վերածել յուրատեսակ «ամերիկյան գյուղի», բայց կան խաղացողներ, որոնք կարող են դիմադրել այդ ծրագրերին։ Այս մասին հայտարարել Է ՌԴ արտաքին գործերի նախարար Սերգեյ Լավրովը RT-ին տված հարցազրույցում։
Նրա խոսքով՝ ամերիկացիների պատկերացումներում աշխարհը յուրօրինակ «սալուն» է՝ Վայրի Արևմուտքի ավանդական բար, որտեղ բոլորը պարում են ամենաուժեղի սրնգի տակ։
«Նրանց հաջողվում է շահերի հիման վրա իրենց շուրջ մոբիլիզացնել ուժեր, նրանք մոբիլիզացնում են ամբողջ արևմտյան աշխարհը։ Դա, ի դեպ, վառ վկայություն է, թե իրականում որքանով են ՆԱՏՕ-ի և ԵՄ-ի անդամները անկախ»-հայտարարել է նախարարը։
Սակայան կան խաղացողներ, որոնք երբեք չեն համաձայնի «գլոբալ գյուղի» գոյությանը՝ ամերիկացի շերիֆի ղեկավարությամբ։ Դրանք են՝ Չինաստանը, Հնդկաստանը, Բրազիլիան, Մեքսիկան։ Դրանք այն երկրներն են, որոնք չեն վազի կատարելու այն, ինչ կհրամայի «քեռի Սեմը»։
Եվ Ռուսաստանը նույնպես այդ երկրների թվին է պատկանում, համոզված է Լավրովը։
Հիշեցնենք, որ Արևմուտքի երկրները խոշոր ֆինանսական, տնտեսական և այլ պատժամիջոցներ են սահմանել Ռուսաստանի դեմ այն բանից հետո, երբ Մոսկվան փետրվարի 24-ին ռազմական գործողություն սկսեց Ուկրաինայում:
