ՀՀ ԱԳՆ-ն մանրամասներ է ներկայացրել Հայաստանի և Թուրքիայի հատուկ բանագնացների՝ Ռուբեն Ռուբինյանի և Սերդար Քըլըչի հանդիպման մասին։
Հաղորդագրության մեջ, մասնավորապես, ասվում է. «Այսօր՝ փետրվարի 24-ին, Վիեննայում տեղի է ունեցել Հայաստանի և Թուրքիայի միջև հարաբերություների կարգավորման գործընթացի հատուկ ներկայացուցիչներ ՀՀ ԱԺ նախագահի տեղակալ Ռուբեն Ռուբինյանի և դեսպան Սերդար Քըլըչի հանդիպումը:
Հատուկ ներկայացուցիչները վերահաստատել են, որ բանակցությունների վերջնական նպատակը Հայաստանի ու Թուրքիայի միջև լիարժեք կարգավորումն է, ինչպես պայմանավորվել էին Մոսկվայում իրենց առաջին հանդիպման ընթացքում:
Նրանք մտքեր են փոխանակել այդ կապակցությամբ համատեղ հնարավոր կոնկրետ քայլեր ձեռնարկելու շուրջ և վերահաստատել իրենց համաձայնությունը՝ գործընթացը շարունակելու առանց նախապայմանների»:
Ավելի վաղ Radar Armenia-ն տեղեկացրել էր, որ Հայաստանի և Թուրքիայի հատուկ բանագնացների հանդիպումը տեղի է ունեցել Վիեննայի Փարկ Հայաթ հյուրանոցում և տևել է 2 ժամ:
