Ազգային անվտանգության ծառայությունը, մինչ այժմ, 44-օրյա պատերազմի ընթացքում պետական դավաճանության միայն մեկ քրեական գործ է քննել։ Այս մասին հայտնում է ԱԱԾ-ն՝ պատասխանելով Sputnik Արմենիայի հարցմանը։
«44-օրյա պատերազմի դեպքի առթիվ քննչական բաժնում ՀՀ քրեական օրենսգրքի 233-րդ հոդվածի հատկանիշներով հարուցվել և քննվել է մեկ քրեական գործ»,- ասված է հաղորդագրությունում։
Գործն ուղարկվել է դատարան, երկու մեղադրյալների նկատմամբ քրեական հետապնդում է իրականացվում։
Հիշեցնենք, որ դեռևս 2021 թվականի հունիսին Հայաստանի Ազգային անվտանգության ծառայությունը հայտնել էր, որ բացահայտել է դավաճանության և լրտեսության դեպք հօգուտ Ադրբեջանի։ Նախարարության տվյալներով՝ նախկինում «Անբասիր ծառայության համար» և «Ռազմական գործողություններին մասնակցելու համար» մեդալներով պարգևատրված նախկին զինծառայողն ընկերոջ հետ մեկնել է Թուրքիա, որտեղ առաջարկ է ստացել որոշակի վճարի դիմաց փոխանցել համապատասխան տվյալները։
Նրանք լուսանկարել և նկարահանել են զինտեխնիկա, ռազմավարական օբյեկտներ (ջրամբարներ, հիդրոէլեկտրակայաններ, ռազմավարական բարձունքներ), պարզել են աշխատակիցների թիվը, հակաօդային պաշտպանության համակարգերի գտնվելու վայրը Հայաստանում և Լեռնային Ղարաբաղում։ Այս ամենը նրանք՝ հատուկ հավելվածի միջոցով, ուղարկել են թուրքական համարներին։
