ՀՀ կառավարության կողմից թուրքական ապրանքների էմբարգոյի չեղարկումը համարժեք չէ առկա իրողություններին։ Այսպես է կարծում տնտեսագետ Արմեն Քթոյանը։
Sputnik Արմենիայի հետ զրույցում նա նշում է, որ հարցն ունի տարբեր շերտեր. Նախ, եթե նայենք զուտ տնտեսական տեսանկյունից, ապա գոյություն ունի մոտեցում, ըստ որի` առևտուրը պետք է լինի երկուստեք, մինչդեռ մենք տարիներ շարունակ ունեցել ենք ձևախեղված իրականություն և միայն ներմուծել ենք թուրքական ապրենքներ` արտահանելով գրեթե ոչինչ։
Քթոյանի կարծիքով` եթե նման իրավիճակը շարունակվում է, ապա անհարժեշտ է համարժեք քայլեր ձեռնարկել, և այդ առումով թուրքական ապրանքների արգելքն իրավիճակի տրամաբանական արձագանքն էր։
Քթոյանի դիտարկմամբ` թուրքական ներմուծումն էժանացած լիրայի ֆոնին շատ ավելի շահավետ կլինի Թուրքիայի, այլ ոչ թե Հայաստանի համար, քանի որ թուրքական ապրանքներն ինչպես մեծ հաջողությամբ մրցակցում էին հայկական շուկայում, հիմա ավելի մեծ հաջողությամբ կզբաղեցնեն իրենց տեղը, և մեր արտադրողները կհայտնվեն կրկնակի ոչ շահեկան վիճակում։
Տնտեսագետի գնահատմամբ` տվյալ հարցում կան նաև ոչ տնտեսական գործոններ, որոնք կապված են 44-օրյա պատերազմի հետ, և պատահական չէ, որ էմբարգոյի որոշման մեջ դրված էր նաև ազգային արժանապատվության բաղադրիչը։ Հետևաբար թուրքական ապրանքների ներմուծման արգելքի չեղարկումը հակադարձ ազդակներ է հաղորդում հասարակությանը։ Քթոյանի համոզմամբ` որոշումն ավելի շատ բացասական ուղերձներ է պարունակում, քան դրական։
Նշենք, որ 2022 թվականի հունվարի 1-ից ՀՀ կառավարությունը որոշել է չեղարկել թուքական ապրանքների ներկրման էմբարգոն։
Հիշեցնենք` Հայաստանը թուրքական ապրանքների ներկրման արգելք էր սահմանել 2020թ–ի հոկտեմբերին` այն բանից հետո, երբ Թուրքիան բացահայտ աջակցել էր Ադրբեջանին Արցախի դեմ 2020թ. սեպտեմբերի 27–ին սկսած ագրեսիայի մեջ։
Մինչ այդ Հայաստանը Թուրքիայից ներմուծում էր տարեկան 250-270 մլն դոլարի ապրանք։
