ՀՀ երրորդ նախագահ Սերժ Սարգսյանը ՀՀԿ համագումարից հետո խոսել է հայ-թուրքական հարաբերությունների կարգավորման գործընթացի մասին:
Լրագրողի հարցին՝ արդյո՞ք գործող իշխանություններին կհաջողվի կարգավորել երկու երկրների հարաբերությունները, Սերժ Սարգսյանն արձագանքել է.
«Կարծում եմ՝ այսօրվա իշխանությունների հաջողության մասին խոսելը, հատկապես՝ այդ բնագավառում, ավելորդ է: Ինչ վերաբերում է 2009-2010 թվականների իրադարձություններին, ապա իրադարձությունը շատ մասնագիտորեն վերլուծել է նախկին արտգործնախարար Էդվարդ Նալբանդյանը:
Այնպես որ, դրա մասին խոսելն էլ ճիշտ չեմ համարել, և ընդհանրապես, եթե նկատել եք, մեր ձեռքբերումների մասին ևս չեմ խոսել, որովհետև դրանք արդեն անցյալում են։ Այսօր պետք է խոսենք խնդիրների և մեր անելիքների մասին՝ ինչն էլ մենք արեցինք», — ասաց Սերժ Սարգսյանը։
Դիտարկմանը, որ գործարար միջավայրում ոմանք ոգևորվել են հայ-թուրքական հարաբերություններից, երրորդ նախագահն արձագանքեց.
«Այդ գործարարները ո՛չ քաղաքականությունից են հասկանում, և ո՛չ էլ գործարար միջավայրը բարելավելուց»։
