Բնակչության պարտադիր բժշկական ապահովագրությունը Հայաստանում լավագույն դեպքում կներդրվի 2019 թվականի վերջից, իսկ ապահովագրավճար կսահմանվի կամ բացարձակ թիվ, կամ աշխատավարձի առավելագույնը 2 տոկոսը:
ՀՀ առողջապահության նախարար Լևոն Ալթունյանի տեղեկացմամբ՝ պարտադիր բժշական ապահովագրության համար կա երկու բանաձև, երբ քաղաքացին ամսական վճարում է 6000 դրամ ապահովագրավճար, կամ 50 տոկոսը վճարում է քաղաքացին, իսկ 50 տոկոսը՝ գործատուն: Ըստ Լ. Ալթունյանի՝ ամսական գանձվող 6000 դրամն աննախադեպ ցածր գումար: Օրինակ՝ Չեխիայում ապահովագրավճարը կազմում է աշխատավարձի մոտ 15 տոկոսը: Հայաստանում աշխատավարձերն ավելի ցածր են, հետևաբար շատ ավելի ցածր կլինի ապահովագրավճարը. «Մենք մոդելավորել ենք բոլոր իրավիճակները: Նույնիսկ բժշկի չդիմելու դեպքում ամսական ապահովագրավճարի մոտ 3000 դրամը վերադառնալու է ընտանիքին սքրինինգային հետազոտությունների շնորհիվ: Մենք գանձում ենք այդ գումարը, որպեսզի ծախսենք մարդկանց առողջության վրա, երկարացնենք առողջ կյանքի տևողությունը»,-տեղեկացրեց նախարարը:
