Այսօր՝ հոկտեմբերի 23-ին, խոշոր ավտովթար է տեղի ունեցել Երևանում: Ժամը 19:00-ի սահմաններում, Շիրակի փողոցում, «Ռենեսանս» ռեստորանային համալիրի հարևանությամբ բախվել են Գարրի Օհանջանովի վարած Opel և Արամ Բալթայանի վարած Opel մակնիշի ավտոմեքենաները: Ինչպես դեպքի վայրից հայտնում է ֆոտոլրագրող Գագիկ Շամշյանը, բախման հետևանքով Գ. Օհանջանովի Opel-ը գլխիվայր շրջվել է:
Օպերատիվորեն դեպքի վայր են ժամանել ՀՀ ոստիկանության պարեկային ծառայության Երևանի գնդի 2-րդ գումարտակի պարեկները՝ գումարտակի հրամանատար Լևոն Բադալյանի, գումարտակի հրամանատարի տեղակալ Դավիթ Նիկողոսյանի գլխավորությամբ:
Օպերատիվորեն ժամանել է նաև Երևանի 1-03 շտապօգնության բժիշկների հերթապահ խումբը՝ ովքեր տեղում բուժօգնություն են ցուցաբերել վարորդներին, սակայն վերջիններս հրաժարվել են հիվանդանոց մեկնելուց, նշելով՝ որ իրենց լավ են զգում: Տեղում հետաքննական աշխատանքները ղեկավարում է նույն գումարտակի ավագ պարեկ Աղասի Պողոսյանը, ում կողմից փաստի առթիվ նյութեր են նախապատրաստվում: Երկու վարորդները տեղում նույն գումարտակի կրտսեր պարեկ Անահիտ Սարգսյանի կողմից ենթարկվել են սթափության փորձաքննության, պարզվել է, որ Գ. Օհանջանովը եղել է խմածության ամենաբարձր աստիճանի, ով տեղում զրկվեց ավտոմեքենան վարելու իրավունքից և նրա նկատմամբ կազմվեց վարչական ակտ, իսկ Ա. Բալթայանը եղել է սթափ: Ֆոտոլրագրողի տեղեկություններով, Գ. Օհանջանովը Opel-ը շահագործում էր որպես տաքսի:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
