Facebook-ի աշխատանքի խափանումը տեղի է ունեցել գլխավոր երթուղիչների փոխդասավորվածության փոփոխությունների պատճառով, հայտնել է ընկերության ինժեներների թիմը:
«Մեր ինժեներական թիմերը պարզել են, որ գլխավոր երթուղիչների փոխդասավորվածության փոփոխությունները, որոնք պատասխանատու են մեր տվյալների մշակման կենտրոնների միջեւ ցանցային տրաֆիկի համակարգման համար, խնդիրների են հանգեցրել, որոնք ընդհատել են հաղորդակցությունը: Ցանցային տրաֆիկի այս խափանումը կասկադային ազդեցություն ունեցավ մեր տվյալների մշակման կենտրոնների կապի եղանակի վրա, ինչն էլ պատճառ դարձավ, որ մեր ծառայությունները դադարեցին աշխատել»,- ասված է Facebook-ի ինժեներների կայքում արված հայտարարության մեջ:
Facebook-ը նաեւ հայտարարել է, որ խափանումն օգտատերերի տվյալների բացահայտման չի հանգեցրել:
Ավելի վաղ Privacy Affairs ինտերնետ պարբերականը սոցցանցերում խափանումների մասին հաղորդագրությունների ֆոնին հայտնել էր, որ Facebook-ի 1.5 միլիարդ օգտատերերի տվյալները վաճառքի են հանվել սեւ շուկայում: Ըստ չհաստատված տեղեկությունների՝ խոսքը սոցցանցի օգտատերերի անունների, ֆիզիկական եւ էլ. հասցեների եւ հեռախոսահամարների մասին է:
«Մենք չունենք որեւէ ապացույց, որ օգտատերերի տվյալները վտանգվել են խափանումների արդյունքում»,- ասվում է Facebook-ի կայքում տարածված հաղորդագրության մեջ:
Facebook-ը, Instagram-ը, WhatsApp-ը եւ ընկերությանը պատկանող մի շարք այլ հավելվածներ երկուշաբթի գրեթե յոթ ժամ անհասանելի էին օգտատերերի համար:
