Կառավարությունը որոշում ընդունեց «Հյուսիս-հարավ» ճանապարհի Սիսիան-Քաջարան հատվածի (այդ թվում Բագրուշատի թունելի) կառուցման ներդրումային ծրագրի մեկնարկի վերաբերյալ: Ինչպես փոխանցում է «Արմենպրես»-ը, այս ճանապարհահատվածի իրականացումը սահմանվեց առաջնահերթություն ընդհանուր ծրագրի այլ հատվածների շինարարության նկատմամբ։
Տարածքային կառավարման և ենթակառուցվածքների նախարարի տեղակալ Վաչե Տերտերյանը նշեց, որ ծրագրի իրականացումը հնարավորություն կտա արդիականացնել Իրանին կապող ճանապարհահատվածը, մեծացնել հետաքրքրությունը Հայաստանի տարածքով տարանցիկ երթևեկության նկատմամբ, ապահովել Հայաստանի Հանրապետության հարավային շրջանների անվտանգությունը։
«Որոշումը պայմանավորված է մինչև Իրանի սահման անվտանգ, ապահով ու արագընթաց ճանապարհ ունենալու անհրաժեշտությամբ։ Նախատեսվում է իրականացնել 100 կմ/ժամ հաշվարկային արագությամբ, շուրջ 60 կմ ընդհանուր երկարությամբ նոր ճանապարհահատված: Կլինեն 4.7 կմ ընդհանուր երկարությամբ մի քանի կամուրջներ ու 12.5 կմ ընդհանուր երկարությամբ թունելներ` ելնելով մեր երկրի լանդշաֆտի առանձնահատկություններից։ Նշեմ, որ ամենաերկարը Բարգուշատի թունելն է, որի երկարությունը կկազմի շուրջ 8.6 կմ»,- ասաց Տերտերյանը՝ հավելելով, որ նախատեսված շինարարական աշխատանքների արժեքը կազմում է շուրջ 487 մլրդ դրամ։
Վարչապետ Նիկոլ Փաշինյանն իր հերթին նշեց, որ սրանով թևակոխում են Հյուսիս–հարավ մայրուղու Սիսիան-Քաջարան հատվածի շինարարական գործընթացի մեկնարկի փուլ։
«Հիմա մենք արդեն մրցութային փաթեթներն ենք պատրաստելու և հայտարարելու ենք միջազգային մրցույթ, ու հույս ունենք, որ 2022 թվականի ավարտին արդեն շինարարության նախնական փուլը կմեկնարկի»,- ասաց նա։
Նիկոլ Փաշինյանը նշեց նաև, որ հաջորդը Թալին–Գյումրի հատվածն է, որտեղ ակտիվ շինարարական աշխատանքներ են իրականացվում:
«Նախատեսում էինք, որ 2020 թվականին հատվածի մի ուղղությունը պետք է շահագործման հանձնվեր, սակայն, կորոնավիրուսով պայմանավորված, օտարերկրյա գործընկերները չկարողացան ժամանել: Այս տարի ամբողջ ծավալով տեղի է ունենում աշխատանքը»,- նկատեց վարչապետը։
«Սա նոր որակ կբերի մեր տնտեսությանը, մեր հաղորդակցությանը` ԻԻՀ-ի հետ մեր տնտեսական կապերի ամրապնդմանը։ Դա որոշակի հետաքրքրություն կառաջացնի Պարսից ծոցը Սև ծովին կապելու նախագծերի շրջանակներում։ Եթե հարցը դիտարկենք ավելի լայն համատեքստում` տարածաշրջանային բոլոր կոմունիկացիաների բացման շրջանակներում, ապա այս ծրագիրը բոլորովին այլ մասշտաբ ու նշանակություն է ունենում»,– ասաց Նիկոլ Փաշինյանը՝ հավելելով, որ միայն Սիսիան-Քաջարան հատվածի շինարարությունը կարելի է համարել Երրորդ Հանրապետության պատմության ամենամասշտաբային շինարարական նախագիծը:
Փոխվարչապետ Սուրեն Պապիկյանն էլ հավելեց, որ հոկտեմբերի 20-ին կունենանք մեկ ուղղությամբ բացված Թալին-Գյումրի հատվածը:
