Պատերազմից տասն ամիս անց, որի հետևանքով Ադրբեջանը կարողացավ վերահսկողություն սահմանել Լեռնային Ղարաբաղի շրջանի նկատմամբ, Հայաստանի սահմանամերձ շրջաններն էլ գտնվում են Բաքվի սպառնալիքի ներքո։
Վկայակոչելով պաշտոնական Երևանի տարածած տեղեկությունները՝ France 24-ը գրում է, որ այս տարվա մայիսի կեսերին, հարյուրավոր ադրբեջանցի զինվորներ են մուտք գործել Հայաստանի տարածք՝ մասնավորապես Սյունիք և Գեղարքունիք։
«Այս իրավիճակը մտահոգություն և նույնիսկ խուճապ է առաջացնում Հայաստանում, հատկապես սահմանամերձ գյուղերում, որտեղ միջադեպերը հաճախակի են»,- գրում է աղբյուրն ու ներկայացնում Հայաստանում պատրաստած մեծ ռեպորտաժը։
«Գժվում եմ, որ հիշում եմ՝ էս տարի չպետք է մտնեմ իմ հողամասը։ Ծախելով մինչև ո՞ւր է հասնելու։ Ես չեմ կարողանում հարմարվել։ Ի՞նչ է ուզում մեր հայ ազգից, Ալիևն ո՞վ է, որ ծիծաղի իմ ազգի վրա»,- ռեպորտաժում ասում է շուռնուխցի Անահիտ Ալեքյանը, ում տունը մնացել է Շուռնուխի՝ ադրբեջանցիներին տված հատվածում։
Շուռնուխցի կինն ասում է՝ իրեն ոչ օգնություն, ոչ գումար է հարկավոր։
«Իմ հողամասը թող տան ինձ, իմ տունը տան ինձ»,- լացով նշում է Անահիտ Ալեքյանը։
Շուռնուխի գյուղապետ Հակոբ Արշակյանը, որի տունը նույնպես մնացել է ադրբեջանցիներին, ասում է՝ հոգում ցավ է ապրում։
