ԵՊՀ Միջազգային հարաբերությունների և դիվանագիտության ամբիոնի դոցենտ Գրիգոր Բալասանյանը Sputnik Արմենիայի եթերում անդրադարձել է հայ ռազմագերիներին ՀՀ վերադարձնելու գործում ԱՄՆ միջնորդությանը և այդ նպատակով ԱՄՆ Կոնգրեսի հայկական հանձնախմբի շրջանառության դրած բանաձևին։
ԱՄՆ Կոնգրեսի հայկական հանձնախմբի առաջ քաշած բանաձևը ապրիլի քսանչորսին ընդառաջ արվող նախաձեռնություն է, որից մեծ ակնկալիքներ ունենալ պետք չէ։ Sputnik Արմենիայի հետ զրույցում այսմասին ասաց ԵՊՀ Միջազգային հարաբերությունների և դիվանագիտության ամբիոնի դոցենտ Գրիգոր Բալասանյանը։
ԱՄՆ–ն կկարողանա՞ լռեցնել Ալիևին. Հայ դատի հանձնախումբը նոր բանաձև է պատրաստել
«Ֆորմալ առումով միգուցե օրենսդիր մարմիններում այդ առաջ քաշած հայտարարությունն անցնի, սակայն գործնական առումով այն որևէ ազդեցություն չի կարող ունենալ գերիների վիճակի և գերիների վերադարձի գործընթացի վրա»,- ասաց նա։
Նրա խոսքով` որպեսզի նախաձեռնությունը հայտարարության մակարդակում չմնա և նաև գործնականում միս ու արյուն ստանա, նախևառաջ Հայաստանի իշխանությունները պետք է շահագրգռություն ցուցաբերեն, ռազմագերիներին թշնամական Ադրբեջանից օր առաջ Հայաստան տեղափոխելու կամք դրսևորեն։
«Այդ ռազմագերիները նախ Հայաստանի քաղաքացիներ են։ Ես չեմ տեսել, որ վերջին շրջանում Հայաստանի քաղաքացիները բովանդակ առումով ԵԱՀԿ Մինսկի խմբի երկրների համանախագահ պետություններին` Ֆրանսիային և ԱՄՆ-ին դիմած լինեն իրենց քաղաքացիներին օգնելու և ռազմագերիների տուն վերադարձի հարցով»,- նշեց Բալասանյանը։
Նրա կարծիքով` ցանկացած երկրի թիվ մեկ խնդիրը պետք է լինի իր քաղաքացիների և նրանց իրավունքների պաշտպանությունը, մինչդեռ Հայաստանի իշխանությունները կարծես թե տարբեր հաշվարկներով Ադրբեջանում պահվող մոտ 200 հայ գերիներին վերադարձնելու ուղղությամբ իրենց առաքելությունն ավարտված են համարում։
Հիշեցնենք, որ ԱՄՆ Կոնգրեսի հայկական հանձնախումբը Ներկայացուցիչների պալատում շրջանառության մեջ է դրել Ադրբեջանում պահվող հայ ռազմագերիների վերաբերյալ բանաձև, որն արդեն ստացել է 31 կոնգրեսականի աջակցությունը: Բանաձևով Ադրբեջանին կոչ է արվում անհապաղ ազատ արձակել հայ ռազմագերիներին, որոնք Բաքվում պահվում են պատերազմից ամիսներ անց:
