Հարազատներին պատերազմում կորցրած մարդիկ ոչ միայն ծանր հարված են ստացել և սգի մեջ են, այլև հայտնվում են ահասարսուռ պատմությունների մեջ։ Այս մասին գրում է «Հրապարակը»:
«Զոհված զինծառայողի ծնողներին իրենց որդու փոխարեն ուրիշ զինծառայողի դի են տվել, նրանք հուղարկավորել են իրենց հարազատին, հետո պարզվել է, որ դիակների փնտրտուքով զբաղվող անձինք շփոթել են։
Դեպքը տեղի է ունեցել Արագածոտնի մարզի Բազմաղբյուր համայնքում։ Պատերազմում զոհված զինծառայողի ծնողները նոյեմբերին հուղարկավորել են իրենց որդու դին, սակայն 3 օր առաջ զանգ են ստացել, և իրենց ասել են, որ թյուրիմացություն է տեղի ունեցել՝ այլ անձի են հուղարկավորել, գերեզմանում իրենց որդին չէ, պետք է արտաշիրմում անել և դիակը հանձնել տիրոջը։
Տեղեկությունը ճշտելու համար կապվեցինք Բազմաղբյուր համայնքի ղեկավար Խոսրով Հարությունյանի հետ, նա հաստատեց տեղեկությունը․
«Առանց ԴՆԹ անալիզի են բերել դիակը, նկարը տեսել են, շատ նման են իրար եղել, հիմա հարազատները իրենց որդու դիակն են փնտրում, հաստատ սխալ դիակ են բերել։ Ծնողներն էլ խոսել են դիակի տիրոջ հետ, հասկացել են միմյանց, հիմա պետք է իրենց որդու դիակը գտնեն, որպեսզի բերեն, արտաշիրիմում անեն»,- ասաց համայնքապետը»,-գրում է լրատվամիջոցը:
