Այսօր առավոտյան հանդիպել ենք վարչապետի հետ, անձամբ հրավիրել էր երկու հոգու, հանդիպեցինք, խոսեցինք, ներկայացրեցինք մեր պահանջը: Այս մասին, այսօր՝ սեպտեմբերի 23-ին, հայտեց Կառավարության շենքի դիմաց հացադուլ սկսած քաղաքացիներից մեկը: Նշենք, որ նրանք պահանջում են բանակցել ՌԴ գործընկերների հետ, որպեսզի ՌԴ-ն բացի Հայաստանի հետ սահմանը։
«Վարչապետը մեզ ներկայացրեց, որ սահմանների չբացվելը կապված է կորոնավիրուսի տվյալների հետ, որը բարձր է հայաստանում: Ամեն դեպքում, վարչապետը հուսադրող պատասխան տվեց, որ անպայման կփորձի ինչ-որ լուծման եզրեր գտնել, որ գոնե այս 200 հոգին, որ փողոցում են, գոնե իրենց հարցը լուծվի ինչ-որ տարբերակով: Չգիտենք, թե դա երբ կլինի այսօր, թե 5 օրից: Ամեն դեպքում մեր ակցիան շարունակվում է: Հիմա մեզ կմիանան մեր ընկերները, կլինի ակցիա, իսկ երեկոյան, բոլորը կգնան, մենք մեր 20 հոգով կշարունակենք մեր հացադուլը»,-ասաց ակցիայի մասնակիցը՝ նկատելով, որ վարչապետի խոսքը շատ ջերմ էր:
Ավելի վաղ NEWS.am-ը հայտնել էր, որ ՌԴ մեկնել պահանջող քաղաքացիները նախօերին հացադուլ էին սկսել կառավարության դիմաց: Նշենք, որ վերջին շաբաթներին նրանք պարբերաբար ցույցեր էին անցկացնում ինչպես Ազգային ժողովի շենքի մոտ, այնպես էլ Կառավարության, սակայն նրանց խնդրին այդպես էլ լուծում չտրվեց:
