Այսօր կառավարությունը քննարկեց և ընդունեց նախագծերի փաթեթ, որը թույլ կտա այլևս չերկարաձգել արտակարգ դրությունը և օրենքների փոփոխության միջոցով շարունակել պայքարել համաճարակի դեմ:
Քննարկման ընթացքում պարզվեց, որ նախագծերի փաթեթն օրինակ ՄԻՊ-ը մեկ օր առաջ է ստացել: Ամեն դեպքում կառույցը հասցրել է մի շարք առաջարկություններ կազմել:
«Ես ուզում եմ հասկանալ՝ այս գործելակերպին երբ է վերջ տրվելու, որ կառավարության նիստում հնչում է, թե կարծիքի չի ուղարկվել կամ երեկ երեկոյան է ուղարկվել: Սա ինչքան է շարունակվելու»,-հարցրեց վարչապետ Փաշինյանը:
Վարչապետի աշխատակազմի ղեկավար Էդուարդ Աղաջանյանն ասաց, որ իրենք կարծիքի ուղարկելու ու շրջանառելու գործառույթ չունի: Այն գերատեսչությունը, որը նախաձեռնում է, պետք է անի դա մինչև վարչապետի աշխատակազմ ներկայացնելը․ «Ամեն դեպքում ուզում եմ տեղեկացնել, որ նախարարական կոմիտեի օրակարգն ուղարկվում է բոլորին, բաց է, ինֆորմացիան հասանելի է բոլոր գերատեսչություններին»:
Ապա վարչապետը դիմեց Արդարադատության նախարար Ռուստամ Բադասյանին, ով զեկուցել էր նախագիծը՝ հարցնելով, թե ինչու չի շրջանառվել:
Բադասյանն ասաց, որ մինչև վերջին պահը պարզ չի եղել, թե ով պետք է զեկուցի:
Ավելի վաղ հայտնվել էր, որ նախագիծը մշակվել է Առողջապահության նախարարության հետ: Իսկ նախարար Արսեն Թորոսյանը նիստին չէր մասնակցում:
«Ի՞նչ կապ ունի, թե ով պետք է զեկուցեր»,-հարցրեց Փաշինյանը:
«Կաֆկայի «դղյակը» պետք է դարձնել կառավարության կանոնադրության հավելված: Եկեք դադարեցնենք, կգնաք կքննարկեք մինչև ստորագրության բերելը: Մինչև բոլոր գերատեսչությունների հետ չքննարկվի, ստորագրության չբերեք»,-ասաց վարչապետը՝ առաջարկելով քվեարկությամբ ընդունել հարցը, սակայն ստորագրությունը դեռ չի լինելու, քանի դեռ բոլորի հետ չի քննարկվել:
Նախագծերի փաթեթն ընդունվեց:
