Նոր տեսակի կորոնավիրուսային համավարակով պայմանավորված՝ մի քանի ամիս է՝ ՀՀ-ում արտակարգ դրություն է սահմանված։ Համավարակի՝ Հայաստանում տարածվելուց հետո, արտակարգ դրության պայմաններում մարդկանց տեղաշարժը սահմանափակված էր, տանից դուրս գալուց քաղաքացիները պարտադիր պետք է իրենց հետ ունենային անձնագիր, տեղաշարժման թերթիկ, դիմակ և կատարեին տվյալ պահին արտակարգ իրավիճակից բխող այլ քայլեր։
Ոստիկանական ուժեղացված հսկողություն էր սահմանվել։ Օրինախախտ քաղաքացիները տուգանվում էին և հիմա էլ շարունակվում են տուգանվել անձնագիր, տեղաշարժման թերթիկ (այժմ այդ պահանջը հանված է) կամ դիմակ չունենալու համար։ Դրսում անձնագիր չունելու դեպքում տուգանքը սահմանվել էր 100-250 հազար դրամ։
Մեծ թվով քաղաքացիների նկատմամբ այդ ընթացքում կազմվեցին արձանագրություններ։ Հասարակական դժգոհություն առաջացավ։ Մայիսի 19-ի նիստում Ազգային ժողովում երկրորդ ընթերցմամբ 87 կողմ ձայնով ընդունվեց Վարչական իրավախախտումների վերաբերյալ օրենսգրքում փոփոխությունների օրենսդրական նախագիծը:
Նախագծով սահմանվում է ազատ տեղաշարժվելու պայմանները խախտելու համար 10.000 դրամ տուգանք՝ գործող 100-250 հազար դրամի փոխարեն։ Սակայն, կարծես, Ազգային ժողովի ընդունած օրինագիծն այդպես էլ մնաց թղթի վրա։
«Առաջին լրատվական»-ին դիմած ՀՀ քաղաքացի Արմեն Հայրապետյանը ահազանգում է, որ Դատական ակտերի հարկադիր կատարման ծառայությունը (ԴԱՀԿ) մարդկանցից բռնագանձում է 100 հազար դրամ, այնինչ, իրենք, ըստ օրենքի, պետք է վճարեն 10 հազար դրամ։
Սկսենք սկզբից։ Մեզ դիմած քաղաքացին այս տարվա ապրիլի 29-ին Օղակաձև այգու տարածքում մարզվելուց հետո տուն վերադառնալիս որոշում է մտնել խանութ, գնումներ կատարել։ Այդ ընթացքում իրեն են մոտենում ոստիկանության ծառայողներ, անձնագիր պահանջում։ Վերջինս անձնագիրը մոռացել էր տանը, սակայն իր հետ ուներ տեղաշարժման թերթիկը, որի մասին ոստիկաններն անգամ չեն հարցրել։ Հետևաբար՝ կազմվել է արձանագրություն՝ տուգանել քաղաքացուն անձնագիր չունենալու, պարետի որոշումը չկատարելու համար՝ 100 հազար դրամ։
Հուլիսի 27-ին Արմեն Հայրապետյանը ԴԱՀԿ-ից ծանուցում է ստանում, որ որոշում է կայացվել պետբյուջեի օգտին բռնագանձել 100 հազար ՀՀ դրամ՝ գումարած 5000 դրամ՝ որպես կատարողական գործողությունների կատարման ծախս։ Քաղաքացու խոսքերով՝ համատարած 100 հազար դրամների գանձումը կատարվում է, միայն ինքը չէ։
«Մեկ շաբաթ առաջ ես հարկադիր ծառայողից ստացա այս ծանուցումը, որ գանձում է կատարվելու 100 հազար դրամ։
Բայց ես գիտեմ, որ Ազգային ժողովը 100 հազար դրամները փոխել էր 10 հազար։ Ես ավելին ասեմ, որ իմ ընկերոջը, որին ևս նույն բանի համար տուգանել էին, արդեն գանձել են, աշխատավարձի քարտից գումարը պահել են։ Ես դիմեցի մեր տարածքային ոստիկանություն, ուղարկեցին գլխավոր վարչություն, ասացին՝ այնտեղ պետք է փոխած լինեն, մենք տեղյակ չենք։ Գնացի վարչություն իրավաբանի մոտ, որն ինձ ասաց, որ դա մեզ չի վերաբերում։ Իմ արձանագրության մեջ գրված է՝ իբր ես խախտել եմ ինքնամեկուսացման ռեժիմը, բայց ես հիվանդ չեմ եղել, որ մեկուսանամ կամ խախտեմ։ Ինձ անձնագիր չունենալու համար են տուգանել։ Հետո իրավաբանը ասաց, դե չգիտեմ, բայց սա չի ազդում ձեր վրա։ Հետո ասացին, որ ճիշտ կլինի դատարան դիմես։ Հիմա չգիտեմ։ 100 հազար դրամի համար 200 հազար դրամ ծախս անեմ, որ դատարան դիմեմ։ Ես փաստաբանների եմ դիմել, ինձ ասացին, որ բացառվում է, որ 100 հազար դրամ վճարեմ, քանի որ օրենքը տարածվում է իմ տուգանքի վրա, պետք դա ավտոմատ փոխվեր համակարգում»,- ասաց քաղաքացի Արմեն Հայրապետյանը, որը մի քանի անգամ ԴԱՀԿ է գնացել, սակայն իրեն ոչ ոք չի ընդունել։
Հիշեցնենք, որ «Վարչական իրավախախտումների վերաբերյալ օրենսգրքում լրացում և փոփոխություն կատարելու մասին» օրենքի նախագծով առաջարկվում է ավելի մեղմ պատժաչափ՝ 10.000 դրամի չափով ազատ տեղաշարժման պայման-պահանջը խախտելու համար: Խոսքը, մասնավորապես, բաց տարածքներում դիմակ կրելու պահանջի մասին է, որի խախտման դեպքում գործող օրենքով տուգանքը 100-250 հազար է, հիմա առաջարկվում է նման դեպքերում սահմանել 10.000 դրամ: ԱԺ-ում քննարկման ժամանակ արդարադատության նախարարի տեղակալ Վահե Դանիելյանը տեղեկացրել էր, որ քննարկումների արդյունքում ստացել են առաջարկություններ «Բարգավաճ Հայաստան» խմբակցությունից և «Իմ քայլը» խմբակցության պատգամավորներ Նիկոլայ Բաղդասարյանից, Սուրեն Գրիգորյանից, Վլադիմիր Վարդանյանից: Նրա խոսքերով՝ այդ առաջարկությունների հիման վրա նախագիծը խմբագրվել է: Ըստ այդմ՝ առաջարկվում էր, որ հետադարձ ուժ կիրառվի, և այս դրույթը տարածվի նաև նախկինում 100-250 հազար դրամ տուգանք կիրառված դեպքերի վրա: «Այս նախագծով մենք կարգավորել ենք, որ եթե նախկինում անձը ենթարկվել է 100-250 հազար դրամի չափով տուգանքի, ապա եռամսյա ժամկետում կվերանայվեն այդ վարչական ակտերը, և կսահմանվի 10.000 դրամ: Այն անձինք, որոնք արդեն իսկ վճարել են սահմանված տուգանքը, ապա այդ անձանց կվերադարձվի 10 հազարից ավելի վճարված գումարը»,- ասել էր Դանիելյանը:
1in.am
