Այս տարի պտղի այգիներում բերքի 30 տոկոս նվազում ունենք։ Այս մասին «Առաջին լրատվական»-ի հետ զրույցում հայտնեց «Ագրարագյուղացիական միավորում» ՀԿ նախագահ Հրաչ Բերբերյանը։
«Դրա պատճառը փոշոտման ժամանակ ինտենսիվ անձրևներն էին։ Այդ ընթացքում մեղուներն այնքան էլ հաջող չաշխատեցին այգիներում։ Ու արդյունքում ունենք միջակից ցածր բերք։ Տարբեր հիվանդություններ կան, սնկային, վիրուսային։ Ցավոք սրտի պետության այն կառույցները, որոնք պետք է ակտիվ դերակատարում ունենային բույսերի պաշտպանության հարցում, կարծես թե չեն աշխատել։ Երեկ նայում էինք խնձորի այգիները, հազար հիվանդություն կա։ Գյուղացին պետք է գիտակ լինի, տեղեկացված լինի, թե ի՞նչ, ո՞նց, ե՞րբ սրսկի»,- մեզ հետ զրույցում ասաց Հրաչ Բերբերյանը, ապա հավելեց՝ գյուղնախարարությունը չի կարողանում պայքարել վնասատուների դեմ, մի քանի անգամ ձախողել են, մասնագետներ չկան։
Խոսելով կոնկրետ ծիրանի, դեղձի, կեռասի բերքի մասին, Բերբերյանն ասաց, որ այդ երեք մրգերից միայն կեռասն է մի քիչ բարվոք վիճակում գտնվում։ Ծիրանի ու դեղձի բերքը պակասել է։ Բերբերյանի խոսքով՝ ռեկորդային արտահանումների մասին այս տարի պետք է մոռանալ․ «Իհարկե, կունենանք արտահանում, բայց ռեկորդային արտահանման մասին խոսելն ավելորդ է»։
Մեր զրուցակիցը նշեց, որ Հանրապետությունում ընդհանուր առմամբ պակասել է մեղվի քանակը, հետևաբար փոշոտումն ու բերքը։ «Ի դեպ՝ մեղուների քանակի պակասումը միայն Հայաստանում չէ։ Եվրոպական երկրներում 25-30 տոկոսով պակասել է մեղվի քանակը։ Փոշոտումը պակասել է, բերքի քանակն էլ հետևաբար պակասում է։ Եվրոպացի գիտնականները կարծում են, որ դա պոպուլային կապի արդյունքն է։ Այսինքն՝ հաղորդիչները վնասում են մեղվի պոպուլյացիային։ Մեկ այլ կարծիք էլ կա։ Բույսերի պաշպանության թունաքիմիկատները, որոնք դաշտերում սրսկում են, դրանք են վնաս տալիս մեղուներին։ Այնպես որ, տենդենցը միայն Հայաստանում չէ։ Պետք է հմուտ մոտեցում ցույց տալ, որ հաջորդ տարիներին նման խնդիրներ չլինեն։ Ժողովրդի մեծ մասն ուղղակի չի էլ հասկանում, որ մեղվաբուծությունը գյւողատնտեսության կարևոր ուղղություններից մեկն է ու դա պետք է միշտ կայուն զարգացած պահել»,-մանրամասնեց գյուղոլորտի մասնագետը։
Այս տարի ծիրանի, դեղձի, կեռասի շուկայական գներն ավելի թանկ կլինեն, քան նախորդ տարիներին։ «Դե արտահանման մասով ևս ավելի թանկ կլինի։ Գիտեք, մեր հիմնական շուկան Վրաստան, Ռուսաստանն է։ Ռուսաստանում մի զանգված կա, ով ծանոթ է հայկական ծիրանին ու դա է ձեռք բերում։ Բայց և կա էժան ծիրան՝ թուրքմենական, տաջիկական, որն ավելի վաղ է մտնում ռուսական շուկա։ Ճիշտ է՝ համային հատկություններ չունի, որակականով զիջում է, բայց էժան է, անծանոթ մարդու համար տորթն էլ է միրգ»,- ասաց Բերբերյանը, ապա ավելացրեց՝ չի կարծում, թե արտահանման քանակի մասով մեր գյուղացիները, տնտեսվարողները խնդիր կունենա, քանի որ այդքան մեծ քանակությամբ բերք չկա, որ չհասցնեն արտահանել։
«Քանակն այնքան քիչ է, որ նման խնդիր չի կարող առաջանալ։ Եվ հետո, այդ խնդիրները գալիս են մարդկանց անորակ աշխատանքից։ Մենր ֆերմերները Եվրոպայից տնկանյութ էին ստանում, Վրացի վարորդները, ովքեր մտնում էին Հայաստան կորոնավիրուսի մեր մասնագետները երկու-երեք վարորդի մոտ ջերմություն հայտնաբերեցին։ Հետո պարզվեց՝ հորինված էր։ Շուտ փչացող այդ ապրանքը մնաց սահմանին։ Հետո իմացանք, որ սա դրամաշորթություն է։ Այդպիսի խոչընդոտներ Ռուսաստանն էլ կանի, ի՞նչ է եղել։ Սովորել են՝ ժողովրդի հաշվին հարստանալ։ Սովորական չինովնիկական կոռուպցիա է։ Ռուսաստանից, Հայաստանից հեռու չէ»,- կարծիք հայտնեց Հրաչ Բերբերյանը։
