Կորոնավիրուսով վարակվելու 134 նոր դեպքի գրանցումը մեկ օրվա ընթացքում առողջապահության նախարար Արսեն Թորոսյանն այսօր կառավարության հերթական նիստում «վատ իմաստով ռեկորդային ցուցանիշ» անվանեց:
«Արհեստական շնչառության սարքերին միացված այս պահին ունենք 6 քաղաքացի, ծանր վիճակում՝ 17, ծայրահեղ ծանր՝ 59: Իրադարձությունների զարգացման այս սցենարի դեպքում մենք հավանաբար շուտով կանցնենք ասիմպտոմ դեպքերին կամ շատ թեթեև վիճակում գտնվող քաղաքացիներին չհոսպիտալացնելու քաղաքականությանը: Բայց այդ որոշումն ընդունելու օրը մենք պետք է հասկանանք, որ դա բերելու է նաև նոր դեպքերի ավելացման: Ենթադրում ենք, որ դեռ 5-6 օր կկարողանանք այս տեմպով ձգել»,- ասաց Թորոսյանը:
Նա նաև հայտնեց, որ գրանցված նոր 134 դեպքերի մեջ մեծ թիվ են կազմում իրար հետ փոխկապակցված անձինք, ինչը հույս է տալիս ենթադրելու, որ աճի այս տեմպը հետագա օրերին հնարավոր է` նվազի:
Աճի աննախադեպ մեծ թիվը, Թորոսյանի խոսքով, դարձյալ հետևանք է հուղարկավորության անցկացման:
«Հուղարկավորությանը վարակված անձ է մասնակցել ու մյուսներին վարակել: Դրա համար դարձյալ պիտի կոչ անենք հնարավորության դեպքում հուղարկավորությունների չմասնակցել ու չհամարել, որ վտանգն ամբողջությամբ անցել է»,- ասաց Թորոսայնը:
